• 09 желтоқсан 2024
• 376

Дарынды жастарға білім гранты табысталды

Қызылорда облыстық білім басқармасы және Қорқыт ата атындағы Қызылорда университеті, облыстық «Qyzylorda» телеарнасы бірлесіп ұйымдастырған «Зияткер» телевизиялық білім бәйгесінің финалдық кезеңі өтті.
Білім сайысының қорытынды кезеңіне Қызылорда облысының аудандары мен қаласындағы мектеп оқушылары қатысып, бақ сынады. Қатысушыларға отандық және дүниежүзі тарихы, мәдениеті, экономикалық жағдайына қатысты түрлі сұрақтар қойылып, логикалық тапсырмалар берілді.

Сайыстың нәтижесі бойынша І орынды Жалағаш ауданы Әл-Фараби атындағы №201 мектеп-лицейінің оқушысы Ербол Айғали жеңіп алса, ІІ орын Қармақшы ауданы Т.Жүргенов атындағы №80 мектеп-гимназиясының оқушысы Динара Макеноваға бұйырды. Ал ІІІ орынды Қызылорда қаласы “Qyzylorda 125 High School” мектебінің оқушысы Ралан Жұмабек  иеленді. Жеңімпаздарға Қорқыт ата атындағы Қызылорда университетінің білім гранты табысталды.
Байқаудың финалдық бәсекесіне Қорқыт ата атындағы Қызылорда университетінің Әлеуметтік және тәрбие жұмыстары жөніндегі проректоры Жандос Базартай, облыстық «Qyzylorda» телернасының директоры Нұрбек Әмиша, облыстық «Жастар ресурстық орталығы» КММ директорының орынбасары Қорған Өтегенов  қатысып, жеңімпаздарды марапаттады. 

Айта кетейік, «Зияткер» білім бәйгесі биыл үшінші мәрте ұйымдастырылып отыр. Байқау білім мен шығармашылықты дамытуға бағытталған және жастардың зияткерлік әлеуетін арттыруға ықпал етеді. Бұл шара қатысушыларға жаңа мүмкіндіктер туғызып, болашақ мамандарды тәрбиелеуге зор үлес қосады.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru