• 12 наурыз 2025
• 148

«Алтын Орда және Қазақ мемлекетінің қалыптасуы» тақырыбында дөңгелек үстел өтті

Қорқыт ата атындағы Қызылорда университетінде «Алтын Орда және Қазақ мемлекетінің қалыптасуы» тақырыбында дөңгелек үстел өтті. Іс-шараға еліміздің және шет елдердің жетекші тарихшылары мен археологтары қатысты. Жиынның модераторы – гуманитарлық-педагогикалық институтының директоры, тарих ғылымдарының кандидаты, доцент Сағат Тайман болды.

Ғылыми жиында Алтын Орда дәуірінің тарихи-мәдени мұрасы, саяси құрылымы, экономикасы, оның ыдырауы және Қазақ мемлекетінің қалыптасуына ықпалы жан-жақты талқыланды.

Дөңгелек үстел барысында «Сарайшық» мемлекеттік тарихи-мәдени музей-қорығының директоры, тарих ғылымдарының докторы, профессор Мұқтар Әбілсейіт «Атырау өңірінің алтынордалық ескерткіштері және оны зерттелуі» тақырыбында баяндама жасап, Сарайшық қаласының Алтын Орда дәуіріндегі маңызын және осы кезеңге жататын археологиялық олжалар туралы тың мәліметтер ұсынды. Казан Федеральді университетінің доценті, тарих ғылымдарының кандидаты Светлана Валиулина «Алтын Орда кезеңіндегі Асанас және Қышқала (Баршынкент) қалаларындағы шыны өндірісі» тақырыбында сөз сөйлеп, ортағасырлық қалалардағы қолөнер өндірісі мен оның саудаға ықпалын атап өтті.

«Тарих және археология» білім беру бағдарламасының профессоры, тарих ғылымдарының докторы Өтеубай Қожақұлы «Алтын Орданың ыдырауы мен күйреуі» тақырыбында баяндама жасап, мемлекеттің құлдырауының ішкі және сыртқы себептерін саралады. Тарих ғылымдарының докторы Тастанбек Сәтбай «Алтын Орда мемлекетінің Еуразия тарихындағы орны» баяндамасында Алтын Орданың аймақтық және халықаралық саясаттағы рөлін ашып көрсетті.

Қызылорда облыстық тарихи-өлкетану музейінің ғалым хатшысы Асхат Сайлау «Алтын Орда кезеңіндегі теңгелердің түрлері (музей қоры бойынша)» баяндамасында сол дәуірдегі ақша айналымы мен сауда-саттықтың дамуын талдады. «Тарих және археология» білім беру бағдарламасының аға оқытушысы, PhD Ыслам Құрманиязов «Алтын Орда кезеңіндегі Сыр өңірі қалалары туралы жаңа деректер» баяндамасында Сыр өңіріндегі ортағасырлық қалалардың зерттелуі жөнінде жаңа мәліметтер ұсынды.

Дөңгелек үстел барысында ғалымдар Алтын Орданың мәдени және саяси мұралары, ортағасырлық қалалар, археологиялық зерттеулер, сауда-саттық, ақша айналымы және мемлекеттің ыдырау себептері туралы ғылыми пікірлерімен бөлісті.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru