• 22 наурыз 2025
• 205

Университет ұжымы Наурыз мейрамын кең көлемде тойлады

Өнер орталығының жанында «Наурыз-берекем, Наурыз-мерекем» атты Ұлыстың Ұлы күніне арналған облыстық іс-шара өтті. Мерекеге орай 23 киіз үй тігіліп, ұлттық ойындар мен көрмелер, концерттік бағдарламалар мен театрландырылған қойылым қойылды.

Қорқыт ата атындағы Қызылорда университеті де Наурыз мейрамын Сыр елі халқымен бірге қарсы алды. Оқу орны ұжымы «Ақындар ауылы» киіз үйін тігіп, қыз бен жігіт айтысын жұртшылық назарына ұсынды. Сонымен қатар, Гуманитарлық-педагогикалық институты өнерпаздарының мерекелік концерті мен жұмысшы мамандықтар мен ғылыми жетістіктер көрмесі ұйымдастырылды. Мерекелік жиынға Басқарма Төрағасы-Ректор Бейбіткүл Каримова қатысып, қазақы салт-дәстүр бойынша тұсаукесер рәсімін жасады. Бүлдіршіннің қадам нық, болашағы жарқын болуын тілеп, Әз-Наурызбен құттықтады.

Көрмеде мемлекет басшысы атаған еліміздің негізгі даму бағыттары: цифрландыру ісі мен жасанды интеллект, аграрлық технологиялар мен су шаруашылығы, химия-биология, физика-химия саласындағы ғылыми жетістіктер мен жобалар таныстырылды.

Биыл университетте Наурызнаманың онкүндігі ерекше аталып өтілді. Көктемнің алғашқы күнінен бастап оқытушылар мен білім алушылардың қатысуымен барлық оқу ғимараттарында тағлымға толы іс-шаралар өтті.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru