• 28 наурыз 2025
• 222

Белгілі ғалым Әбдіжәлел Бәкір - 85 жаста

Қорқыт ата атындағы Қызылорда университетінде ғалым-ұстаз, профессор, Мұстафа Шоқай ғылыми орталығының ғылыми жетекшісі Әбдіжәлел Бәкірдің 85 жылдық мерейтойына арналған салтанатты жиын өтті.

Басқосуда Әбдіжәлел Қошқарұлының ғылыми қызметінің маңыздылығы, оның елдегі саяси ғылымдар саласына қосқан үлесі, сондай-ақ жастарды тәрбиелеудегі рөлі кеңінен баяндалды. 

Қорқыт ата атындағы Қызылорда университетіндегі еңбек жолын 2016 жылы М. Шоқай ғылыми орталығында ғылыми кеңесшісі қызметінен бастап, бүгінде орталықтың ғылыми жетекшісі қызметін атқаруда. Ғалымның әртүрлі тақырыпта жазылған 50-ге жуық ғылыми мақаласы бар. Сонымен қатар, ғалымның «ХIХ ғасырдың екінші жартысы мен ХХ ғасырдың басындағы Қазақстандағы саяси әлеуметтік ойлар», «Мұстафа Шоқай: өмірі мен қызметі, шығармашылығы», «Мұстафа Шоқай. Зерттеулер», «Мұстафа Шоқай: Кемел ой иесі» атты монографиясы жарияланды. Мұстафа Шоқай тақырыбына 60-тан аса ғылыми мақаласы жарық көрген.

Ғылыми кеңесте Әлеуметтік және тәрбие жұмыстары жөніндегі проректор Жандос Базартай профессордың ғылым мен білім саласына қосқан үлесін ерекше атап өтті. Іс-шарада Әбдіжәлел Қошқарұлы облыс әкімінің құттықтау хаты табысталып,  ҚР ғылым және жоғары білім министрлігінің «Қазақстан Республикасының ғылымын дамытуға сіңірген еңбегі үшін» төсбелгісі және Қорқыт ата атындағы Қызылорда университетінің «Үздік оқытушы» төсбелгісімен марапатталды. Сонымен қатар, қазақы дәстүр бойынша құрмет көрсетілді.

Жиынға Қызылорда облысы әкімінің орынбасары Шахмардан Байманов, Қазақстан Республикасының Ұлттық Ғылым академиясы академигі, Қазақстанның еңбек сіңірген қайраткері Қылышбай Бисенов, университет ректорының міндетін атқарушы Майнұр Бөрібаева, Қызылорда телеарнасының директоры Нұрбек Әмиша, И.Әбдікәрімов атындағы агроколледж директорының орынбасары Ермұхан Бауыржан, ардагерлер Қарабала Аманжолұлы мен Аңсат Садуақас, Түркияның Мимар Синан көркем өнер университетінің профессоры, ғалым, түрколог, мұстафашоқайтанушы Әбдіуақап Қара және Қазақстанның еңбек сіңірген қайраткері, ақын, мұстафатанушы Қазақстан Жазушылар одағы төрағасының орынбасары Қасымхан Бегманов, Қазақстанның еңбек сіңірген қайраткері, дәрігер, медицина ғылымдарының кандидаты Тұрғанбай Маханов, ғалымның досы Қалдыбек Айтбаев, еңбек ардагері Ибрагим Әбибуллаев, Мұқан Әмірғалиев және университет ұжымы қатысты.
Облыстың зиялы қауым өкілдері, ел ағалары туған күн иесінің еңбек жолынан естеліктер айтып, құттықтауларын жеткізді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru