• 11 сәуір 2025
• 191

Қорқыт ата университетінде жасыл экономика мен құрылыс саласын дамытуға арналған дөңгелек үстел өтті

Қорқыт ата атындағы Қызылорда университетінде Ғылым айы аясында «Тұрақтылық және жасыл экономикаға көшу, құрылыс саласында білім беруді дамыту» тақырыбында дөңгелек үстел өтті. Шара барысында тұрақты даму мақсаттарын жүзеге асыру, жасыл құрылыс саласындағы өзекті трендтермен танысу және осы бағытта тәжірибе алмасу мәселелері көтерілді.

Іс-шараның ашылуында университеттің Басқарма төрағасы – Ректор Бейбіткүл Каримова алғысөз сөйлеп, Қазақстандық жасыл құрылыс кеңесінің (KazGBC) атқарушы директоры, PhD Александр Белыймен Ынтымақтастық туралы Меморандумға қол қойды. Бұл келісім жасыл экономика бағыты бойынша бірлескен жобаларды жүзеге асыруға жол ашпақ.

Дөңгелек үстелде экономика ғылымдарының кандидаты, Стратегия және ІТ департаментінің директоры Нұрбахыт Нұрмұхаметов, KazGBC атқарушы директоры PhD Александр Белый, техникалық директоры магистр Айман Шопаева және «Архитектура және құрылыс өндірісі» білім беру бағдарламасының жетекшісі, техника ғылымдарының кандидаты Гүлназ Жакапбаева мазмұнды баяндамалар жасап, тың ақпараттармен бөлісті.

Дөңгелек үстел соңында жасыл экономикаға көшу жолында білім беру мен ғылыми ынтымақтастықты нығайту қажеттілігі атап өтілді.