• 28 сәуір 2025
• 155

Республикалық пәндік олимпиада өтті

Қорқыт ата атындағы Қызылорда университетінде «В014 – География мұғалімдерін даярлау» білім беру бағдарламасы бойынша ХVІI Республикалық пәндік олимпиада ұйымдастырылды. Аталған білім сайысына еліміздің 18 жоғары оқу орнынан келген студенттер қатысты.

Олимпиаданың негізгі мақсаты – студенттердің теориялық және практикалық білім деңгейін анықтау, кәсіби шеберліктерін шыңдау, сондай-ақ география пәні мұғалімдерін даярлау сапасын арттыру болды.

Жиынның ашылу салтанатында Ғылыми жұмыстар және халықаралық байланыстар жөніндегі проректор Майнура Бурибаева сөз сөйлеп, олимпиадаға қатысушыларға сәттілік тіледі. Ол өз сөзінде еліміздің білім беру саласында осындай маңызды іс-шаралардың жастар үшін үлкен маңызға ие екенін, ғылым мен білімнің бірігуі арқылы қоғамға үлес қосатын жас географтарды даярлаудың маңыздылығын атап өтті.

Жеңімпаздарды марапаттау рәсіміне университеттің Әлеуметтік және тәрбие жұмыстары жөніндегі проректоры Жандос Базартай қатысты. Ол марапаттау рәсімінде жеңімпаздарды құттықтап, олардың болашақта еліміздің білім беру саласында үлкен жетістіктерге жететіндігіне сенім білдірді. Сонымен қатар, ол олимпиадаға қатысушылардың әрқайсысының білім мен ғылым саласына қосқан үлесін жоғары бағалап, студенттерге еңбектерінің жемісті болуын тіледі.

Жеке есеп бойынша І орын – Айсауле Балтабай (Қазақ ұлттық қыздар педагогикалық университеті), ІІ орын – Ақберен Айжарық (Абай атындағы Қазақ ұлттық педагогикалық университеті), Нұрислам Рахматали (Астана халықаралық университеті), ІІІ орын – Ерсұлтан Тоқташ (Академик Е.А. Бөкетов атындағы Қарағанды университеті), Лекер Набиев (Ш. Уәлиханов атындағы Көкшетау университеті), Мейрамбек Шаяхметов (Х.Досмұхамедов атындағы Атырау университеті) иеленді. 

Топтық есеп бойынша І орын – Абай атындағы Қазақ ұлттық педагогикалық университеті, ІІ орын – Л.Н. Гумилев атындағы Еуразия ұлттық университеті және Қ. Жұбанов атындағы Ақтөбе өңірлік университеті, ІІІ орын – Ө. Жәнібеков атындағы Оңтүстік Қазақстан педагогикалық университеті, М.Х. Дулати атындағы Тараз университеті және М. Қозыбаев атындағы Солтүстік Қазақстан университеті жеңімпаз атанды.

Олимпиада жас географтарға білімдерін тереңдетіп, тәжірибе алмасуға және кәсіби шеберліктерін шыңдауға мүмкіндік берді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru