• 06 мамыр 2025
• 341

Қаһарман халқым – даңқты елім

Қорқыт ата атындағы Қызылорда университетінде Отан қорғаушылар күні мен Жеңіс күніне арналған «Қаһарман халқым – даңқты елім» атты салтанатты жиын өтті.
Мерекелік шарада Қорқыт ата атындағы Қызылорда университетінің Басқарма төрағасы – Ректорының міндетін атқарушы Майнұр Бөрібаева егемен еліміздің тыныштығын қорғау әр азаматтың қасиетті борышы екенін атап өтті.

Қазақстан Республикасы Қарулы күштері – мемлекет қауіпсіздігінің, халықтың бейбіт өмірінің мызғымас кепілі. Бүгінде әлемдегі жер көлемі жөнінен аумағы үлкен мемлекеттің бірі, шекарасы шегенделген, жасампаз жолы айқындалған Қазақстанның ұлттық егемендігі мен тұтастығын нығайтуға кәсіби армиямыздың әлеуеті жоғары.
Биыл – Қазақстан Республикасы Қарулы күштерінің құрылғанына 33 жыл толып отыр. Еліміздің Қарулы күштері мемлекет қауіпсіздігінің, халықтың бейбіт өмірінің мызғымас кепілі. Қарулы күштердің қуаты нығайып, айбыны асқақтай берсін, – деді Майнұр Әбілтайқызы.

Биыл Ұлы Жеңістің 80 жылдығы – тарихымыздағы теңдессіз ерліктің, қайсар рух пен бірліктің символына айналған маңызды белес. Еліміздің қаһарман ұлдары оқ пен от кешкен Ұлы Отан соғысында батыр бабаларымыз жанқияр ерліктің үлгісін көрсетті.
Айта кету керек, 2000-2001 оқу жылында Қорқыт ата атындағы Қызылорда университетінде алғаш рет әскери кафедра ашылды. Кафедрада әскери уақытта ұрыс міндеттерін орындауға қажетті білім мен дағдыға ие запастағы офицерлер дайындалады.

Шарада оқу орнының бірқатар қызметкерлері «Қорқыт Ата атындағы Алтын медальмен», университеттің Құрмет Грамотасымен, Алғыс хатымен марапатталды. Сондай-ақ, университетімізде үздік оқып, қазіргі таңда өз саласының кәсіби шебері атанып, еліміздің дамуына айрықша үлес қосып жүрген түлектерге «Үздік түлек» медалі табысталды.
Салтанатты шара патриоттық рухтағы мерекелік концертпен қорытындыланды.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru