• 08 мамыр 2025
• 329

Қоршаған орта үшін бірлескен бастама

Қорқыт ата атындағы Қызылорда университетінің ғалымдары, білім алушылары және қызметкерлері “РУ-6” ЖШС-не қарасты "Қарамұрын" уран кен орнына іссапармен барды. 
Сапардың басты мақсаты – өндірістік ортада ғылыми-зерттеу жұмыстарын жүргізіп, экологиялық мәселелерді кешенді түрде шешу жолдарын қарастыру.
Қазіргі уақытта “РУ-6” ЖШС Қызылорда облысындағы "Солтүстік Қарамұрын" және "Оңтүстік Қарамұрын" кеніштерінде уранды жер асты ұңғымалы шаймалау әдісімен өндіру және өңдеумен айналысады. Бұл технология – қоршаған ортаға барынша аз зиян келтіретін, бірақ ғылыми бақылауды қажет ететін заманауи әдіс.

Айта кетсек, университет ғалымдары мен студенттері уран өндірісінен кейінгі жердің топырақ құрамын, экожүйелік жағдайын зерттеп, фиторемедиация әдістерін (ластанған жерді өсімдіктер арқылы тазарту) қолдану мүмкіндіктерін қарастырды. Сондай-ақ, өңірдің климаттық жағдайына бейімделген өсімдіктер түрлерін таңдау бағытында зерттеу басталды.

Университеттің бұл бастамасы – табиғи ресурстарды тиімді пайдалану мен өндірістен кейінгі экожүйені қалпына келтіру бағытындағы маңызды қадам. Ғылым тек зерттеу үшін емес, табиғатты сақтап қалу үшін де қызмет етеді.
Қоршаған ортаға жанашырлықпен қарап, ғылыми тәсілдер арқылы табиғатты қалпына келтіруге бірге атсалысайық!

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru