• 14 мамыр 2025
• 69

Құқықтық сауаттылық – жастар болашағының кепілі

Қорқыт ата атындағы Қызылорда университетінде Қызылорда облысы Полиция департаментінің өкілдері студенттермен кездесу өткізді. Шараның басты мақсаты – жастар арасында құқықтық мәдениетті қалыптастыру, есірткі қылмысының алдын алу және салауатты өмір салтын насихаттау.

Кездесуді университеттің Әлеуметтік және тәрбие жұмыстары жөніндегі проректоры Жандос Базартай ашып, жастардың құқықтық сауаттылығын арттырудың маңыздылығына тоқталып өтті. Ол өз сөзінде құқықтық мәдениетті қалыптастыру – тек құқық қорғау органдарының ғана емес, бүкіл қоғамның ортақ міндеті екенін атап өтті. Сонымен қатар жастардың құқықты білуі – олардың өз болашағына жауапкершілікпен қарауының бір көрінісі екенін айтты. Шараға Қызылорда облысы Полиция департаменті бастығының бірінші орынбасары, полиция полковнигі Серік Тоқтыбаев, Есірткі қылмысына қарсы іс-қимыл және киберқылмыспен күрес басқармаларының мамандары, облыстық психикалық денсаулық орталығы директорының орынбасары Аман Тұрсынов және «Аманат» партиясы жанындағы «Жастар Рухы» жастар қанаты төрағасының орынбасары Нұрбол Серікбай қатысты.

Бас оқу ғимаратында және №5, №9 оқу корпустарында өткен кездесулерде студенттерге есірткінің адам өміріне, қоғамға тигізетін зияны, құқық бұзушылықтың салдары және қоғамдық тәртіптің маңыздылығы жайлы кең көлемде ақпарат берілді. Сондай-ақ жастарға құқықтық сауаттылықты арттырудың маңыздылығы мен салауатты өмір салтын ұстанудың артықшылықтары туралы түсіндірме жұмыстары жүргізілді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru