• 09 шілде 2025
• 47

Халықаралық тәжірибе: Ресейлік студенттер Қорқыт ата университетінде білімдерін жетілдіруде

Қазіргі таңда жоғары оқу орындарда Президент Қасым-Жомарт Тоқаевтың тапсырмасымен, Қазақстан Республикасының Ғылым және жоғары білім министрлігінің қолдауымен еліміздің жоғары білім беру жүйесінде халықаралық ынтымақтастықты кеңейту және кадрлар даярлау сапасын арттыру бойынша нақты қадамдар жасалуда.
Бүгінде Қорқыт ата атындағы Қызылорда университеті мен Мәскеу авиациялық институты бірлесіп «Экология және табиғатты пайдалану» бағыты бойынша академиялық ұтқырлық бағдарламасын жүзеге асыруда.

Қорқыт ата атындағы Қызылорда университетінде Мәскеу авиациялық институтының студенттері бір айлық өндірістік тәжірибеден өтуде.
Өндірістік тәжірибенің мақсаты – студенттердің кәсіби құзыреттілігін дамыту, ғылыми-практикалық білімін жетілдіру, сондай-ақ Қазақстан мен Ресейдің жоғары оқу орындары арасындағы академиялық және мәдени байланысты нығайту.
Студенттер тәжірибе барысында Қорқыт ата атындағы Қызылорда университетінің Басқарма Төрағасы – Ректор Бейбіткүл Каримова, «AMANAT» партиясы Қызылорда қалалық филиалының атқарушы хатшысы, облыстық мәслихат депутаты Гүлшат Мұсаева және профессор-оқытушылар құрамымен, студенттермен кездесті. 
«Өндірістік тәжірибе – бұл болашақ білікті мамандарды даярлаудың маңызды кезеңі. Біз Мәскеу авиациялық институтының студенттерін университетімізде қарсы алғанымызға қуаныштымыз және олармен нақты ғылыми жобаларды бірге жүзеге асыруға дайынбыз», - дейді университеттің Басқарма Төрағасы – Ректор Бейбіткүл Каримова.

Тәжірибе аясында Мәскеу авиациялық институтының студенттері «Физика-химиялық талдау әдістері» инженерлік бейіндегі зертханамен, Жасанды интеллект институтының жұмысымен және Мәделхан Нәлібаев атындағы су шаруашылығы мұражайымен танысты. Алдағы уақытта студенттер басқа да оқу-зертханалық кешендерге барып, практикалық дағдыларын одан әрі жетілдіреді.
Сонымен қатар, зертханалық зерттеу жұмыстарына қатысып, өңірдің экологиялық және өндірістік ерекшеліктерін зерттеуде.

Айта кетсек, мұндай бастамалар тек академиялық серіктестікті нығайтып қана қоймай, сонымен қатар бірлескен ғылыми жобалар мен қос дипломды білім беру бағдарламаларын іске асыруға, білікті мамандар даярлауға, академиялық ұтқырлықты дамытуға негіз болады. 
Сондай-ақ, 2025-2026 оқу жылынан бастап «Есептеу техникасы және бағдарламалық қамтамасыз ету» бағыты бойынша қос дипломды білім беру бағдарламасы жүзеге асырылатын болады.

Корқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru