• 21 тамыз 2025
• 238

Қорқыт ата университеті мен SeoulTech: білімдегі жаңа мүмкіндіктер

Қорқыт ата атындағы Қызылорда университетінің Басқарма төрағасы-ректоры Бейбіткүл Каримова Сеул ұлттық ғылым және технология университетінің (SeoulTech) студенттерімен кездесті.

Іс-шараға кореялық делегациямен қатар Жасанды интеллект институтында оқуға қызығушылық танытқан талапкерлер мен олардың ата-аналары да қатысты. Кездесу барысында бағдарлама талаптары мен мүмкіндіктері туралы жан-жақты түсіндірілді.

Жиын барысында ректор: «Қос диплом бағдарламасы – жастар үшін үлкен мүмкіндік. Бұл бағдарлама арқылы студенттеріміз алғашқы екі жылды Қорқыт ата университетінде оқып, келесі екі жылын Кореяда жалғастыра алады.

Нәтижесінде екі елдің дипломын алып, халықаралық деңгейде бәсекеге қабілетті маман болып шығады. Ол үшін ең бастысы – тіл білуге, жаңа білімді меңгеруге талпыныс қажет», – деп атап өтті.

Сондай-ақ кореялық студенттер өздерін таныстырып, оқу ордаларының ерекшеліктері, Корей елінің мәдениеті мен дәстүрлері және студенттердің бір күндік оқу өмірі туралы шолу жасады.

Шетелдік студенттердің Қызылордаға келуі халықаралық тәжірибе алмасу бағдарламасы аясында ұйымдастырылды. Бұл бағдарлама екі елдің жастарына білім саласында бір-бірінен үйренуге, жаңа мүмкіндіктерді ашуға және ортақ жобаларды жүзеге асыруға жағдай жасайды.

Сонымен қатар Жасанды интеллект институтында Қос диплом бағдарламасына қабылданатын студенттер үшін іріктеу сынағы өтті. Конкурсқа барлығы 166 талапкер қатысып, арнайы тест тапсырды. Оның нәтижесінде тек 30 студент іріктеліп алынады. Бұған қоса, халықаралық IELTS сертификаты бар 10 талапкер емтихансыз қабылданып, барлығы 40 студент Қорқыт ата университеті мен Сеултех университеті бірлескен қос диплом бағдарламасы бойынша білім алатын болады.

Корқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_2022@korkyt.kz