• 11 қыркүйек 2025
• 69

Дала күні – дәндік құмайдың өнімділігі мен төзімділігін сынау

Қорқыт ата атындағы Қызылорда университетінде орындалып жатқан «Қазақстандық Арал өңірі күріш жүйелерінің тұзды топырақтарында дәндік құмайдың отандық және шетелдік селекциясы сорттарын экологиялық сынау» тақырыбындағы ғылыми жоба аясында «Ы.Жақаев атындағы Қазақ күріш шаруашылығы ғылыми-зерттеу институты» ЖШС-нің ғылыми-өндірістік стационарында «Дала күні» өткізілді.

Іс-шараға университеттің Ғылым департаментінің директоры Наргүл Сақтағанова, профессор, ауылшаруашылығы ғылымдарының докторы Ибадулла Таутенов, профессор, ауылшаруашылығы ғылымдарының докторы Лаура Тохетова, «Аграрлық технологиялар» білім беру бағдарламасының аға оқытушысы Серік Бекжанов, Инженерлі-технологиялық институтының 6В08171-Агрономия, 6В08773-Аграрлық техника және технология, 7М08172-Өсімдік шаруашылығы, 8D08171-Агрономия білім беру бағдарламасының оқытушылары мен білім алушылары, сонымен қатар, Өзбекстан Республикасының Экология, қоршаған ортаны қорғау және климат өзгеру министрлігі жанындағы Арал өңірінің халықаралық инновациялық орталығының өкілдері Аскарбек Рахимов, Юсуп Тургалиев, Ажинияз Ажимуратов қатысты. 

Жобаның негізгі мақсаты – экологиялық сортсынау негізінде Қазақстандық Арал өңірінің топырақ тұздылығы және қатал агроклиматтық жағдайларына төзімді инновациялық жоғарыөнімді сорттар мен сортүлгілер селекциясы үшін практикалық қызығушылық тудыратын шаруашылық-құнды белгілер кешені бар дәндік құмайдың отандық және шетелдік сорттарының өнімділігіне салыстырмалы талдау жүргізу және жоғарыөнімді генотиптерін іріктеу.

Жоба жетекшісі, ауыл шаруашылығы ғылымдарының докторы, қауымдастырылған профессор Ибадулла Таутенов өз сөзінде: «Жобаның мақсаты – дәндік құмайдың экологиялық жағдайларға бейімді жоғары өнімді отандық және шетелдік сорттарының өнімділігін салыстырмалы бағалау арқылы тұзды топырақтарға бейім, агроклиматтық күйзеліске төзімді генотиптерді іріктеу. Бұл генотиптер кейін ауыл шаруашылығы құрылымдарына енгізіліп, мал шаруашылығына арналған берік жемшөп базасын қалыптастыруға мүмкіндік береді», – деп атап өтті.

Айта кету керек, экологиялық сортсынауға дәндік құмайдың отандық және шетелдік ғылыми ұйымдарынан алынған, атап айтқанда, «Қазақ егіншілік және өсімдік шаруашылығы» ЖШС (Алматы қ.), А.И.Бараев атындағы астық шаруашылығы ғылыми-өндірістік орталығы (Астана қ.), «Оңтүстік-Батыс мал және өсімдік шаруашылығы ҒЗИ» ЖШС-нің филиалы – Өсімдіктер генетикалық қорының Н.И.Вавилов атындағы Арал өңірі тәжірибе станциясының гендік қоры, венгриялық «Alfaseed Kft» тұқым шаруашылығы компаниясы, «Жартылай құрғақ тропиктерге арналған халықаралық өсімдік шаруашылығы ҒЗИ» (ICRISAT, Индия, Хайдарабад қ.), ресейлік «Россорго» (Саратов қ.), «Агроплазма» (Краснодар қ.), «Арал өңірінің халықаралық инновациялық орталығы» (Өзбекстан Республикасы) сорттары мен сортүлгілері тәжірибе алаңында орналастырылған.

Корқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_2022@korkyt.kz