• 23 қыркүйек 2025
• 60

Мемлекет қолдаған спортшының мақсаты – әлемдік биік

Мен, Алматов Әлижан Мамыржанұлы, Қорқыт Ата атындағы Қызылорда университетінің студентімін. Спорт – менің өмірімнің ажырамас бөлігі. Қазіргі таңда грепплинг пен панкратион спорт түрлері бойынша спорт шеберіне үміткермін.

Осы уақытқа дейін біраз жетістіктерге қол жеткіздім. Атап айтсам, Әлем чемпионы, екі дүркін Ашық Азия чемпионы, екі дүркін Қазақстан чемпионы, облыстық жарыстардың бірнеше дүркін жеңімпазы атандым. Сонымен қатар, Open Astana халықаралық турнирінде күміс жүлдеге ие болдым. Панкратионнан Қазақстан кубогінде чемпион атанып, облыстық жарыстарда да жеңіс тұғырынан көрінудемін.

Бүгінгі таңда мемлекетіміз жастарға ерекше қамқорлық танытып келеді. Әрбір жасқа білім алуға, спортпен айналысуға, өнер мен шығармашылықта қанат қаққанына жол ашылғаны – болашаққа деген сенімнің жарқын айғағы.

Мен спортшы ретіндегі өмірлік жолымда үнемі мемлекетіміздің қамқорлығын сезінудемін. Түрлі деңгейдегі жарыстарға қатысуыма мүмкіндіктер жасаған әрі мені жаттықтырған ұстазтарыма және Отаныма алғысым шексіз!

Мен үшін ең биік мәртебе – көк туымызды әлем алдында көтеріп, оны асқақтата желбірету. Әр жеңіс сәтінде сол көк байрақты қолыма алу – жүрегімдегі Отанға деген адалдықтың дәлелі. Алдағы уақытта да сол туды биіктен түсірмей, ел абыройын асқақтатуға бар күш-жігерімді арнаймын деп уәде беремін.

Қасиетті Қорқыт Ата атындағы Қызылорда университетінде білім алу – мен үшін үлкен мақтаныш. Бұл қара шаңырақ тек ғылым мен білімнің ғана емес, табандылық пен рухтың мектебі. Осында жүріп мен де өз арманымды шыңдап, еңбегіммен ел намысын қорғауға ұмтылып келемін. Мен Қазақстанда туғанымды мақтан етемін!