• 29 қыркүйек 2025
• 62

Қорқыт ата университетінің халықаралық әріптестігі жаңа кезеңге қадам басты

Университеттің Басқарма төрағасы – Ректоры Бейбіткүл Каримова Польша Республикасының Познань қаласынан келген ғалымдарды қабылдап, маңызды кездесу өткізді. Қонақтар қатарында Адам Мицкевич атындағы университеттің профессорлары Пётр Климашик, Михал Рыбак және Медицина ғылымдары университетінің профессоры Пётр Рзумски болды.

Кездесу барысында қос тарап су ресурстарын басқару және экологиялық мониторинг салаларындағы ынтымақтастықты нығайту мақсатында екіжақты меморандумға қол қойды. Аталған келісім негізінде алдағы уақытта бірлескен ғылыми-зерттеу жобаларын жүзеге асыру, бірлескен экспедициялар мен семинарлар өткізу жоспарлануда.

Меморандумның негізгі бағыттары су ресурстарын тиімді және ұтымды пайдалану, аймақтық экологиялық жағдайды зерттеу және мониторинг жүргізу, климаттың өзгеруі және оның экожүйеге әсерін зерделеу, ғылыми кадрлармен алмасу және магистранттар мен докторанттарға бірлескен тағылымдамалар ұйымдастыру.

Жиында сөз сөйлеген университет ректоры Бейбіткүл Каримова Қазақстан мен Польша елдері арасындағы достық қарым-қатынас пен ғылыми байланыстардың жылдан-жылға артып келе жатқанын ерекше атап өтті. Сондай-ақ, ол Қорқыт ата университетінің соңғы жылдардағы жетістіктері, халықаралық серіктестік аясында жүзеге асырылып жатқан жобалар және университеттің болашақтағы даму стратегиясы туралы жан-жақты ақпарат берді.

Сонымен қатар, Польшадан келген ғалымдар да алдағы уақытта нақты жобалар негізінде белсенді жұмыс жүргізуге дайын екендіктерін жеткізді. Олар Қазақстанның табиғи ресурстары мен экологиялық жүйелерін зерттеудің ғылыми маңыздылығын атап өтіп, бірлескен бастамалар екі ел ғылымының дамуына оң ықпал ететініне сенім білдірді.

Аталған меморандум Қорқыт ата университетінің халықаралық байланыстарын кеңейтуге, сондай-ақ аймақтық экологиялық тұрақтылықты қамтамасыз етуге бағытталған нақты ғылыми қадамдардың бірі болмақ.

Алдағы уақытта меморандум аясында екі жақты нәтижелі жұмыстар жүргізіледі.

Корқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_2022@korkyt.kz