• 29 қыркүйек 2025
• 62

Халықаралық археологиялық мектеп: жаңа ғылыми байланыстар орнатылды

Қорқыт ата атындағы Қызылорда университетінің Тарих және археология білім беру бағдарламасының аға оқытушысы Ыслам Құрманиязов Түркістан қаласында Қожа Ахмет Ясауи атындағы Халықаралық қазақ-түрік университетінде өткен «ХІІ Болгар халықаралық археологиялық мектебі» атты конференцияға қатысты.
Ауқымды шараны Орта Азиялық зерттеулер Халықаралық институты, Ә.Х. Марғұлан атындағы Археология институты, Татарстан Республикасының Ғылым академиясы және А.Х. Халиков атындағы Археология институты бірлесе ұйымдастырды.

Мектеп жұмысына Қазақстан, Ресей, Өзбекстан, Тәжікстан және Қытайдан келген 36 жас ғалым қатысты. Бағдарлама аясында «ЮНЕСКО-ның археологиялық нысандарын құжаттандыру», «Ежелгі еңбек құралдарын зерттеуде экспериментті-трассологиялық әдістердің негізгі принциптері» тақырыптарында секциялар жұмыс жасады. Сондай-ақ, «Археологиялық зерттеудегі пәнаралық байланыстар: жетістіктер мен қиындықтар» мәселелері талқыланды.

Жиында Ыслам Құрманиязов баяндама жасап, археологиялық зерттеулерге қатысты тәжірибесімен бөлісті. Сонымен қатар, мектеп жұмысы аясында халықаралық ғылыми байланыстар орнатылып, бірлескен жобаларды жүзеге асыру бағыттары қарастырылды. Әсіресе, Қытай Халық Республикасының Ханчжоу қаласындағы Чжэцзян университетінің Өнер және археология мектебінің деканы, профессор Хонг Чен ханыммен археология және этнология саласында ынтымақтастық орнату, ғылыми-педагогикалық тәжірибе алмасу және меморандумға қол қою мәселелері талқыланды.

Корқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_2022@korkyt.kz