• 01 қазан 2025
• 185

Ғылым ордасындағы қос мереке: Білім мен тағылым тоғысқан күн

Қорқыт ата атындағы Қызылорда университетінде 1 қазан -Қазақстан Республикасының жоғары білім қызметкерлері және халықаралық қарттар күніне арналған салтанатты жиын өтті.

Шарада Ректордың міндетін атқарушы Майнура Бурибаева ұстаздар мен ардагерлерді мерекемен құттықтап, оның маңыздылығын атап өтті.

«Бұл мерекенің біз үшін маңызы ерек. Өйткені күллі түркі жұртының ойшыл-абызы Қорқыт атаның есімі берілген университетіміз - Сыр өңірінің ғылыми прогресі, инновациясы және білім беру үдерісінің негізгі қозғаушы күші екені баршаға аян. Оқу-ағартудың сөнбес шамшырағы жағылып, ғылымның қара шаңырағына айналған ордамыз - білікті мамандар даярлайтын жоғары білім берудің флагманы ретінде қалыптасты һәм мойындалды»,- деді Майнура Бурибаева.

Салтанатты жиында оқу орнының өркендеуіне айрықша үлес қосып жүрген профессор-оқытушылар құрамы мен қызметкерлерге Қазақстан Республикасы Ғылым және жоғары білім министрлігінің, сонымен қатар университеттің құрмет грамоталары мен алғыс хаттары табысталды. Сонымен қатар, 330 ардагерге университеттің кәсіподақ комитеті атынан арнайы сый-құрмет көрсетілді.

Жоғары білім қызметкерлері мен қазыналы қарттар күнінің қатар мерекеленуі – жас ұрпаққа сапалы білім берумен бірге, тағылымды тәрбие мен өмірлік өнегені дәріптеудің айқын үлгісі. Бүгінде Қорқыт ата университетінде 330 ардагер бар, оның 104-і әлі де еңбек етуде.

89 жылдық тарихы бар білім ордасында бүгінде 6 институт, 24 кафедра жұмыс істейді. Университеттің 577 оқытушы-профессорлық құрамының ішінде 22 ғылым докторы, 77 PhD, 189 ғылым кандидаты бар. 155 білім беру бағдарламасы бойынша кадр даярлау жүргізіліп, білім алушылардың жалпы саны 11,7 мыңнан асты. Оның 40 пайыздан астамы – мемлекеттік грант иегері. Айта кетерлігі, соңғы алты жылда студенттер саны 2 есеге артып отыр.

Салтанатты шараға зиялы қауым өкілдері, университет ардагерлері, оқытушы- профессорлық құрам мен қызметкерлер қатысты. Мерекелік жиын концерттік бағдарламаға ұласты. Әсіресе инженерлік-технологиялық институт оқытушыларынан құралған «Хор» ерекше рухани мазмұнға толы кештің көркін ашты. 

Корқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_2022@korkyt.kz