• 13 қазан 2025
• 59

«Kyzylorda Idea Battle» байқауы өңірдің үздік стартаптарын анықтады

Қызылордада инновациялық идеялар аламаны өз мәресіне жетті. Kyzylorda Hub бизнес-инкубаторы ұйымдастырған «Idea Battle» стартаптар байқауында 135 қатысушы өз жобасын ұсынып, өңірдің үздік инноваторлары анықталды. Финалда жеңімпаздар жалпы көлемі 1 000 000 теңге жүлде қорын және білім грантын иеленді.

Байқау Қызылорда облысы әкімі аппаратының «Ақпараттық технологиялар орталығы» КММ және Қорқыт ата атындағы Қызылорда университетінің қолдауымен өтті. «Idea Battle» – жаңа идеясы бар жастарға өз жобасын сарапшылар алдында қорғап, оны жүзеге асыруға нақты мүмкіндік беретін алаң.

Финал барысында денсаулық сақтау, қауіпсіздік, білім беру, маркетинг және басқа да бағыттардағы жобалар таныстырылды.

Бас жүлде (500 000 теңге) мен 1-орынды той индустриясына арналған «ToiBastar» жобасының авторы Ернар Әбдіжәлелұлы жеңіп алды. Платформа мейрамхана мен әртістерді бір жерден таңдауға мүмкіндік береді.
2-орын (300 000 теңге) — жүк тасымалдауды оңтайландыратын логистикалық сервис «MoveLink» жобасының иегері Нұрдәулетке Дүзенов бұйырды.
3-орын (200 000 теңге) — маркетинг процесін автоматтандыратын AI-агент «Addwise» авторы Жантүгел Мұқағалиге табысталды.

Ең ерекше марапат — Қорқыт ата атындағы Қызылорда университетінің білім грантын Ерасыл Айдарбек иеленді. Оның «Remotion» жобасы — инсульттан кейін қолдың ұсақ моторикасын ойын арқылы қалпына келтіретін портативті құрылғы. Бұл шешім ауылдық өңірлерге қолжетімді әрі тиімді медициналық құрылғы ретінде жоғары бағаланды.

Байқау аясында сонымен қатар «Qorğa» (еңбек қауіпсіздігін бақылайтын AI-камера), «Pulse Diagnoser» (жүрек соғысын талдайтын құрылғы), «Kutim.kz» (бет терісін талдайтын мобильді қосымша), «Stop Bullying App» (балаларды буллингтен қорғайтын қосымша) және «PrepAI» (халықаралық емтихандарға дайындайтын AI-платформа) сияқты бірқатар маңызды жобалар ұсынылды.

«Бұл байқау Қызылорда жастарының инновациялық әлеуеті жоғары екенін көрсетті. Біз тек идеяны емес, нақты мәселелерді шешуге бағытталған ойлы жобаларды көрдік. Бұл – өңірдің технологиялық болашағына сенім ұялататын нәтиже», — деді Kyzylorda Hub жетекшісі Жанарыс Тубекбаев.

«Idea Battle» аймақтағы стартап экожүйесін дамытудың маңызды бөлігіне айналды. Ұйымдастырушылар алдағы уақытта байқауды дәстүрлі түрде өткізіп, жас инноваторларға жаңа мүмкіндіктер ашуды жоспарлап отыр.