• 13 қазан 2025
• 36

«Абай тағылымы – өнегелі өмір мектебі» дөңгелек үстелі өтті

Қорқыт ата атындағы Қызылорда университетінің «Қазақ тілі мен әдебиеті және журналистика» білім беру бағдарламасы аясында «Қоңыратбаев» әдебиет үйірмесінің жетекшісі Айман Айтбаеваның ұйымдастыруымен ұлы ойшыл, ақын, ағартушы Абай Құнанбайұлының 180 жылдық мерейтойына арналған «Абай тағылымы – өнегелі өмір мектебі» атты дөңгелек үстел өтті.
Іс-шараның мақсаты – ұлт ұстазының шығармашылық және философиялық мұраларын жастар санасына терең сіңіріп, Абайдың адамгершілік, еңбек, білім, рухани ізденіс туралы ойларын қазіргі заман құндылықтарымен сабақтастыра талқылау болды.

Жиынға профессор-оқытушылар құрамы, студенттер мен жас зерттеушілер қатысты.
Үйірме мүшелері «Абай және адамгершілік ұстаным», «Қара сөздер – рухани тәрбиенің қайнары», «Абайдың жастарға аманаты» тақырыптарында баяндама жасап, өз ой-пікірлерін ортаға салды.
Сондай-ақ, студенттер Абай өлеңдерін мәнерлеп оқып, ақынның шығармашылығына арналған шағын көріністер көрсетті. Әдеби-поэтикалық композициялар мен бейнероликтер арқылы қатысушылар ұлы тұлғаның өмірі мен еңбегіне құрмет білдірді.
Дөңгелек үстел барысында Абай мұрасының қазақ қоғамындағы рухани жаңғыру, ұлттық сана мен адамдық құндылықтарды қалыптастырудағы рөлі кеңінен сөз болды.
Шарада пікір алмасулар, талқылаулар өтіп, қатысушылар ұлы ақынның идеяларының бүгінгі жас ұрпақ тәрбиесінде маңызын атап өтті.

Сондай-ақ «Қазақ тілі мен әдебиеті және журналистика» білім беру бағдарламасының жетекшісі Серікхан Жүзеев сөз алып, іс-шараның маңыздылығына тоқталды. Ол Абайдың даналық ойлары мен адамгершілік қағидалары – жас ұрпақ үшін мәңгілік тәрбие мектебі екенін айта келе, студенттерді шығармашылық ізденіске, рухани байлық пен парасатқа ұмтылуға үндеді.
Іс-шара соңында белсенді студенттерге алғыс айтылып, «Қоңыратбаев» әдебиет үйірмесінің алдағы жоспарлары мен бағыттары талқыланды.

Корқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_2022@korkyt.kz