• 23 қазан 2025
• 102

«Мамандығым – Болашағым»: Қызылордада еңбек нарығының болашағы талқыланды

Қорқыт ата атындағы Қызылорда университетінде Қызылорда облысының жаңа мамандықтар атласын әзірлеу мақсатында «Мамандығым – Болашағым» бағдарламасы аясында форсайт-сессия өтті.

Шараны Қызылорда облысы әкімдігі, ҚР Ғылым және жоғары білім министрлігі және Қорқыт ата атындағы Қызылорда университеті бірлесіп ұйымдастырды.

Іс-шара Қазақстан Республикасының Ғылым және жоғары білім министрі Саясат Нұрбектің бейнеқұттықтауымен басталды. Министр өз құттықтауында форсайт-сессияның жас мамандарды даярлаудағы маңыздылығын атап өтіп, мұндай бастамалар жастарға еңбек нарығындағы жаңа үрдістерді түсінуге және сұранысқа ие кәсіби бағыттарды айқындауға мүмкіндік беретінін жеткізді. Сондай-ақ қатысушыларға сәттілік пен нәтижелі жұмыс тіледі.

Жиында Қорқыт ата атындағы Қызылорда университетінің Басқарма Төрағасы-Ректор Бейбіткүл Каримова құттықтау сөз сөйлеп, сапалы кадр мен білікті мамандар даярлау университеттің басты мақсаты екенін атап өтті.

«Бұл сессия тек бүгінгі сұрақтарға жауап іздеу емес, ол – өңірдің 5–10 жылдық кәсіби даму бағытын анықтайтын маңызды қадам. Біз аймақтың білім, бизнес және өндіріс өкілдерімен бірлесіп, болашақ мамандықтардың нақты картасын жасаймыз», – деді Бейбіткүл Сәрсемханқызы.

«Мамандығым – Болашағым» жобасының жетекшісі Олжас Сәкенов пен Қызылорда облысының білім басқармасы басшысының орынбасары Бекжан Есенбаев та қатысушыларға сәттілік тілеп, жобаның өңірлік еңбек нарығы үшін өзектілігіне тоқталды.

Форсайт-сессия барысында облыстың үш негізгі бағыты – білім беру, ауыл шаруашылығы, сондай-ақ өнеркәсіп және құрылыс салалары бойынша болашақта қажет болатын мамандықтар мен құзыреттер айқындалды. Іс-шараның екінші бөлімінде қатысушылар жұмыс топтарына бөлініп, өңірлік экономиканың даму перспективаларын саралап, еңбек нарығындағы өзгерістерге бейімделу үшін қажетті дағдылар мен мамандықтар жөнінде ұсыныстар дайындады.

Сессия жұмысына салалық сарапшылар, білім басқармасы өкілдері, жұмыс берушілер, жоғары оқу орындары мен колледждердің оқытушылары қатысты.

Форсайт-сессия қорытындысы бойынша ұсыныстар Қызылорда облысының жаңа мамандықтар Атласына енгізіліп, ҚР Ғылым және жоғары білім министрлігі мен облыс әкімдігіне жолданады. Бұл құжат өңірдің кадр саясатына ғылыми негізделген стратегиялық бағыт береді деп күтілуде.

«Атлас нәтижесі арқылы өңірдің колледждері мен университеттері жаңа білім беру бағдарламаларын бейімдей алады. Ал жастар өз болашағын нақты еңбек нарығының талаптарына сай жоспарлай алады», – деді жоба жетекшісі Жандос Оразмаханов.

Айта кетейік, 2023 жылы Қорқыт ата атындағы университеттің 20 қызметкері форсайттық зерттеу әдістемесі бойынша 5 күндік интенсивті курстан өтіп, «Модератор» және «Жинақтаушы-аналитик» сертификаттарын алған болатын. Бұл бағдарлама университет тарапынан қаржыландырылып, жалпы 7 млн 950 мың теңге көлемінде жүзеге асқан. Осылайша университет форсайт мәдениетін енгізуде еліміздегі алғашқы оқу орындарының біріне айналды.

Сонымен қатар, «Мамандығым – Болашағым» жобасы Қазақстан Республикасы Үкіметінің қаулысымен бекітілген «Халық табысын арттырудың 2029 жылға дейінгі бағдарламасы» аясында іске асырылуда. Жобаның басты мақсаты – аймақтық еңбек нарығындағы өзгерістерді болжау және студенттерге ерте кәсіби бағдар беру арқылы болашаққа бейімделген жаңа буын мамандарды даярлау.