• 11 қараша 2025
• 44

Қорқыт ата университеті «Araldy Saqta» экологиялық акциясына қатысты

Қорқыт ата атындағы Қызылорда университеті Мемлекет басшысының бастамасымен жүзеге асырылып жатқан Арал теңізінің құрғаған табанына сексеуіл егу жобасына қолдау білдіріп, «Araldy Saqta» экологиялық акциясына белсенді қатысты.
Ауқымды шара Халықаралық Аралды құтқару қоры және «Фридом Банк Қазақстан» акционерлік қоғамының ұйымдастыруымен өтті. Акцияның басты мақсаты – Арал теңізінің құрғаған табанындағы 60 гектар аумаққа 18 мың дана қара сексеуіл көшетін отырғызу арқылы экожүйені қалпына келтіруге үлес қосу.

Іс-шараға ХАҚҚ ҚР Атқарушы дирекциясы директордың орынбасары Марат Нарбаев, ХАҚҚ Атқарушы комитетінің өкілі Мүсілім Жиенбаев, «Фридом Банк Қазақстан» АҚ Қызылорда қаласындағы филиалының басшысы Айдос Жетпісбай, Қызылорда облысының табиғи ресурстар және табиғат пайдалануды реттеу басқармасының өкілдері, «Тұран ойпаты – Арал теңізі» қоғамдық бірлестігінің төрайымы Айнұр Рысбаева, «Арал орман және жануарлар дүниесін қорғау жөніндегі» коммуналдық мемлекеттік мекемесінің басшысы Ардақ Жетебаев, сондай-ақ Қорқыт ата университетінің ғалымдары, магистранттары мен студенттері қатысты. Университет тарапынан акцияны «Биология, география және химия» білім беру бағдарламасының аға оқытушысы, эколог ғалым Оразхан Айдаров бастап барды.

     

Мамандардың айтуынша, Арал теңізінің құрғаған табанының жалпы аумағы шамамен 6 млн гектарды құрайды, оның 2,8 млн гектары – Қазақстан аумағында. Бүгінге дейін теңіз табанының 791 мың гектарында (79%) орман мелиорациясы жұмыстары жүргізілген. Оның ішінде көшеттеп отырғызу әдісімен – 154,7 мың га, себу әдісімен – 443 мың га, ал табиғи өсуіне ықпал жасау жұмыстары 164,3 мың га аумақта жүзеге асқан.

   

Экологиялық акция аясында университет студенттері мен магистранттары теңіз табанының қазіргі жағдайымен танысып, сексеуілді қолмен және арнайы техниканың көмегімен отырғызу әдістерін тәжірибеде үйреніп, табиғатты қалпына келтіру ісіне өз үлестерін қосты.
Бұл бастама жастардың экологиялық мәдениетін арттырып қана қоймай, Арал өңіріндегі экологиялық апаттың салдарын азайтуға бағытталған маңызды қадамдардың бірі болып табылады.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru