• 19 қараша 2025
• 39

Ұлттық әдеби мұра – ұрпаққа үлгі

Қорқыт ата атындағы Қызылорда университетінде «Ұлттық әдеби мұра және оны оқытудың өзекті мәселелері» атты облыстық ғылыми-практикалық конференция өтті.
Жиынды университеттің Академиялық мәселелер бойынша проректоры Дана Абдрашева ашып, қатысушыларға сәттілік тілеп, ұлттық әдебиетті ұрпақ санасына сіңірудің маңыздылығына тоқталды.

Конференция барысында Қызылорда облысының білім басқармасының «Дарын» облыстық қосымша білім беру орталығы директорының орынбасары Гүлжахан Избасарова II облыстық (өңірлік) жас әдебиетшілердің шығармашылығын дамытуға арналған көшпелі әдеби алаңының жұмыс барысы жайында баяндап, атқарылып жатқан игі істерге тоқталды.
Шара аясында Қорқыт ата атындағы Қызылорда университетінің «Қазақ тілі мен әдебиеті және журналистика» білім беру бағдарламасы бойынша аға оқытушылар, филология ғылымдарының кандидаттары Алдажар Әбілов – «Ә. Қоңыратбаев – прозаик», Айман Айтбаева – «С. Досжанованың “Ауылдан шыққан миллионер” повесін оқытудың тиімді әдістері», Гүлзира Оралова – «Ә. Қоңыратбаев әдістемесінің көркем шығарманы оқытудағы теориялық және практикалық мәні» тақырыптарында мазмұнды баяндамалар жасады.

Сонымен қатар, облыс аудандарынан келген ұстаздар «Абай қара сөздеріндегі рухани-адамгершілік құндылықтар», «Бердібек Соқпақбаев шығармалары – тұлғалық дамудың мектебі» сынды өзекті тақырыптарды талқылап, тәжірибе алмасты.
Конференция ұлттық әдебиетті дәріптеу, жас буынға рухани құндылықтарды жеткізу және әдебиетті оқыту әдістемесін жетілдіру бағытында маңызы зор пікір алаңына айналды.