• 24 желтоқсан 2025
• 126

Қорқыт ата университетінің студенттері «Дубна» халықаралық ғылыми-білім беру мектебіне қатысты

Қорқыт ата атындағы Қызылорда университетінің «Физика және математика» білім беру бағдарламасы бойынша білім алушылары Ресей Федерациясының Дубна қаласында 15–21 желтоқсан аралығында өткен «Дубна» халықаралық ғылыми-білім беру мектебіне қатысты.   
Шара ТМД елдері арасындағы ғылыми ынтымақтастықты дамыту, жас зерттеушілердің кәсіби біліктілігін арттыру және физика мен математика саласындағы заманауи бағыттармен таныстыру мақсатында ұйымдастырылды.    

Университеттен аталған мектепке «Физика және математика» БББ жетекшісі Лариса Каинбаева жетекшілігімен студенттер Әсия Шайықислам, Асқар Әли, Айдана Төлеу, Азамат Егізбаев, Айым Тасболатова және Қарақат Аман қатысты.   
Бағдарлама барысында қатысушылар өз елін және Қорқыт ата университетін таныстырып, Дубна қаласына экскурсия жасап, Дубна университеті мен Біріккен ядролық зерттеулер институтында (ОИЯИ) өткен ғылыми дәрістер мен көрмелерге қатысты.   

Сонымен қатар, зияткерлік сайыстар мен тәжірибелік сабақтарда өз білімдерін сынап көрді. Оқу бағдарламасын сәтті аяқтаған барлық қатысушыларға арнайы сертификаттар табысталды. 
Бұл тәжірибе университет студенттерінің халықаралық ғылыми кеңістікке енуіне, кәсіби және зерттеу қабілеттерін жетілдіруге мүмкіндік берді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru