• 20 қаңтар 2026
• 23

Оқытушылар CHATGPT EDU бағдарламасын меңгереді

Ұлттық құрылтай аясында Сыр өңіріне жұмыс сапарымен келген ҚР Ғылым және жоғары білім министрі Саясат Нұрбек Қорқыт ата атындағы Қызылорда университетінің профессор-оқытушылар құрамымен кездесті. Жиынға сондай-ақ вице-министр Гүлзат Көбенова және бірқатар жоғары оқу орындарының ректорлары қатысты.  

Алдымен министр университеттің жуырда қолданысқа берілген жаңа заманауи кітапханасымен танысты. Одан әрі көпшілік алдында сөз алған Саясат Нұрбек ғылым мен жоғары білімнің даму бағыттары, инфрақұрылымды жетілдіру, жасанды интеллект саласындағы жаңашылдықтар мен алға қойылған мақсаттар жайлы кеңінен тоқталды. Өңірлік университет оқытушылары ChatGPT EDU бағдарламасының 5,5 соңғы нұсқасын сабақ процесінде тиімді қолдану бойынша арнайы курстан өткізіледі. Жыл көлемінде 126 мың педагогтың ЖИ бойынша біліктілігін арттыру жоспарланып отыр.  

«Бағдарламаны одан әрі іске асыру үшін еліміздің әр өңірінен 27 «зәкірлі» ЖОО іріктеліп, бекітілді. Оқу орындары бағдарламаны іске асыру үшін қажетті инфрақұрылым, оның ішінде ЖИ саласындағы білім беру бағдарламаларының, шетелдік серіктестердің, есептеу қуаттарының болуы сияқты критерийлер бойынша іріктелді. Бұл ЖОО-лар AI-Sana бағдарламасы бойынша студенттер мен педагогикалық оқытушы құрамын оқытуды қамтамасыз ете отырып, өз өңіріндегі және көршілес облыстардағы жобаны іске асыруға жауапты болады», - деді министр.

Жиында сонымен қатар Саясат Нұрбек елдегі 80 университетке 229 ЖИ-агенті енгізілгенін жеткізді. Тағы 363 ЖИ-агенті жасақталып жатыр. Бұл қосымшалар қабылдау комиссиясы, дәріс беру, кітапхана және психологиялық орталық жұмысын жеңілдетуге мүмкіндік береді.

Кездесуде жоғары оқу орындары арасындағы серіктестікті нығайту, шетелдік филиалдарды көптеп ашу және заманауи зерттеу инфрақұрылымын қалыптастырудың маңызы жөнінде кеңінен талқыланды. Әсіресе елімізге білім іздеп келген шетелдік студенттердің өңірге тез бейімделуі үшін жаңа тетіктер енгізу керектігі айтылды. Министр бұл қадамдар еліміздің білім беру жүйесін халықаралық деңгейге көтеретіндігіне сенім білдірді. Жиын соңында Саясат Нұрбек профессор-оқытушы құрамы өкілдерінің сұрақтарына жауап берді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru