• 20 ақпан 2026
• 52

Университет басшысы Педагогика және дәстүрлі өнер институтының ұжымымен кездесті

Қорқыт ата атындағы Қызылорда университеті Басқарма төрағасы–Ректор Наурызбай Байқадамов Педагогика және дәстүрлі өнер институтының ұжымымен кездесті. 
Кездесудің негізгі мақсаты – институттың білім беру сапасы, ғылыми әлеуеті және алдағы даму бағыттарын талқылау болды.
Жиында институт директоры Наку Мирманов оқу орнының қазіргі жағдайы, жеткен жетістіктері мен жоспарланған мақсаттары жөнінде баяндама жасады. 
Бүгінде Педагогика және дәстүрлі өнер институтында бакалавриат бойынша 12, магистратура бойынша 5, докторантура бойынша 2 білім беру бағдарламасы жүзеге асырылып келеді. Жалпы 1806 білім алушы түрлі деңгейде білім алуда. Оның ішінде 1717 студент бакалавриатта, 72 магистрант, және 17 докторант өз салалары бойынша оқу үрдісін жалғастыруда. 

Институтта студенттердің академиялық ұтқырлығын дамытуға ерекше көңіл бөлінуде. Қазіргі таңда 14 студент ішкі академиялық ұтқырлық бағдарламасы аясында еліміздің өзге жоғары оқу орындарында білім алуда, ал 5 студент сыртқы академиялық ұтқырлық бойынша шетелдік серіктес университеттерде тәжірибе жинақтап жүр. 
Сонымен қатар, институт түлектерінің еңбек нарығындағы белсенділігі де жоғары. 2024–2025 оқу жылы бойынша түлектердің жұмысқа орналасу көрсеткіші – 75%-ды құрап отыр. Бұл көрсеткіш институт түлектерінің сапалы білім алып, өз мамандықтары бойынша сұранысқа ие екенін айғақтайды. 

Кездесу барысында ректор педагогикалық кадрларды даярлау мен дәстүрлі өнер саласындағы ғылыми бағыттарды дамытудың маңыздылығын атап өтті. Сондай-ақ, оқу үдерісін жаңғырту, цифрлық технологияларды енгізу, студенттердің шығармашылық және ғылыми белсенділігін арттыру бағытында нақты тапсырмалар берді.
Сондай-ақ қатысушылар институттың материалдық-техникалық базасын нығайту, білім беру бағдарламаларын еңбек нарығына бейімдеу, студенттердің әлеуметтік жағдайларын жақсарту секілді өзекті мәселелерді де ортаға салды.
Шара соңында университет басшысы ел өміріндегі маңызды саяси өзгерістерге тоқталып, конституциялық реформа мен республикалық референдумның мән-маңызы туралы кеңінен сөз қозғады.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru