• 12 наурыз 2026
• 64

Қызылордада Digital Qazaqstan Battle стартап-баттлының жартылай финалы өтті

Қорқыт ата атындағы Қызылорда университетінің Kyzylorda Hub алаңында ұлттық технологиялық форум Digital Qazaqstan аясында ұйымдастырылатын Digital Qazaqstan Battle стартап-жобалар байқауының өңірлік жартылай финалы өтті.

Байқаудың негізгі мақсаты – Қазақстандағы технологиялық кәсіпкерлікті дамыту, перспективалы стартап-жобаларды анықтау және оларды әрі қарай дамытуға қолдау көрсету.

Жүлде қоры 19 миллион теңгені құрайтын Digital Qazaqstan Battle – еліміздің әр өңіріндегі инновациялық жобаларды біріктіретін маңызды алаң. Байқау бірнеше кезеңнен тұрады: алдымен жобалар ұйымдастыру комитеті мен сарапшылар комиссиясының іріктеуінен өтеді, кейін өңірлік жартылай финалдарда үздік жобалар анықталып, финалға жолдама алады. Финалдық кезең 2026 жылғы 27 наурызда Шымкент қаласында ұлттық технологиялық форум Digital Qazaqstan аясында өтеді.

Қызылордадағы жартылай финалға әртүрлі бағыттағы 12 инновациялық стартап-жоба қатысты. Қатысушылар өз жобаларын қазылар алқасына таныстырып, олардың тиімділігі, инновациялық әлеуеті және нарықтағы даму мүмкіндіктері бойынша бағаланды.

Жартылай финалға қатысқан жобалар қатарында:
FoodLink, Cortex AI, Zhailau AI, Sheber.kz, EPICfolio, PhishGuard, PrepAI, AgriX, MediaHub, Kutim.kz, EcoQogam және ProjectZero AI стартаптары бар.
Жартылай финалдың қазылар алқасы құрамында Қызылорда облысының цифрлық технологиялар басқармасының басшысы Сабит Ибадулла, «JSOFT» ЖШС директоры Ғани Ерназаров және «Grand Technology» компаниясының басшысы Антон Баев болды. Жобаларды бағалау барысында сарапшылар стартаптардың масштабталу мүмкіндігіне, инновациялық тартымдылығына, даму көрсеткіштеріне және команда құрамына ерекше назар аударды.

«Digital Qazaqstan Battle жартылай финалына қатысу мен үшін үлкен тәжірибе болды. Өз жобамды сарапшылар алдында таныстырып, олардың ұсыныстары мен бағасын алу – маңызды қадам. Енді финалда өңіріміздің атынан лайықты өнер көрсетуге тырысамын», – деді жеңімпаз атанған Cortex AI жобасының авторы Асылжан Абдуллаев.

Бағалау нәтижесінде үздік жоба анықталып, ол Қызылорда өңірінің атынан 27 наурызда Шымкент қаласында өтетін Digital Qazaqstan Battle финалында бақ сынайды.

Kyzylorda Hub жетекшісі Жанарыс Тубекбаевтың айтуынша, бұл байқау өңірлердегі талантты IT-командаларды анықтап, олардың жобаларын жаңа деңгейге шығаруға мүмкіндік береді.

Digital Qazaqstan Battle байқауы – еліміздегі технологиялық стартаптарды қолдауға және инновациялық экожүйені дамытуға бағытталған маңызды бастамалардың бірі. Мұндай алаңдар жас кәсіпкерлерге өз идеяларын таныстырып, сарапшылардан кері байланыс алып, жобаларын жаңа деңгейге көтеруге мүмкіндік береді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru