• 16 наурыз 2026
• 36

Қорқыт ата атындағы Қызылорда университетінде «Pi-Synergy – 2026» халықаралық инженерлік байқауы өтті

Қорқыт ата атындағы Қызылорда университетінде «Pi-Synergy – 2026» (International Engineering Mindset Competition) халықаралық инженерлік ақыл-ой байқауының финалдық кезеңі өтті. Аталған байқау студенттердің инженерлік, ғылыми және жобалық ойлау қабілеттерін дамытуға, инновациялық идеяларды қолдауға және халықаралық академиялық ынтымақтастықты нығайтуға бағытталған.

Байқаудың финалдық кезеңіне Қазақстан мен шетелдік жоғары оқу орындарының студенттік командалары қатысып, өздерінің ғылыми-инженерлік жобаларын таныстырды. Шара студенттер үшін тәжірибе алмасу, жаңа идеялар ұсыну және кәсіби байланыстар орнату алаңына айналды.

Іс-шараның салтанатты ашылуында университеттің Басқарма мүшесі – Ғылыми жұмыстар және халықаралық байланыстар жөніндегі проректор Майнура Бурибаева қатысушылар мен қонақтарды құттықтап, халықаралық байқаудың маңыздылығына тоқталды. Ол өз сөзінде инженерлік ойлау мен инновациялық жобалардың қоғам дамуы үшін маңыздылығын атап өтті.

Байқау бағдарламасына сәйкес қатысушылар екі кезең бойынша сынға түсті. Алғашқы кезеңде командалар «Команда – болашақ технологияларының әлеуетті көшбасшысы» тақырыбында өз командаларын таныстырса, екінші кезеңде қатысушылар инженерлік кейстер бойынша тапсырмаларды орындап, жобаларын сарапшылар алдында қорғады.

Халықаралық байқауға Қазақстан мен Өзбекстанның жетекші жоғары оқу орындарының студенттік командалары қатысты. 
Байқау барысында қатысушылар тұрақты даму және экология, цифрлық технологиялар, жасанды интеллект, құрылыс және сәулет, қолданбалы математика және білім беру технологиялары бағыттары бойынша өз жобаларын ұсынды.

Байқау қорытындысы бойынша қазылар алқасының шешімімен үздік командалар анықталып, жеңімпаздар марапатталды.
І орын Қазақ ұлттық қыздар педагогикалық университетінің командасына табысталды.ІІ орын Мұхтар Әуезов атындағы Оңтүстік Қазақстан университеті мен Қ. Сәтпаев атындағы Қазақ ұлттық техникалық зерттеу университетінің командаларына, ал ІІІ орын Өзбекәлі Жәнібеков атындағы Оңтүстік Қазақстан педагогикалық университеті, Қожа Ахмет Ясауи атындағы Халықаралық қазақ-түрік университеті және Қазақ бас сәулет-құрылыс академиясының командаларына бұйырды.

Сондай-ақ,байқауда ерекше идеяларымен көзге түскен командалар арнайы  номинациялармен марапатталды. 

«Pi-Synergy – 2026» халықаралық байқауы жас инженерлердің ғылыми-зерттеу әлеуетін дамытуға, инновациялық жобаларды қолдауға және университеттер арасындағы ғылыми байланыстарды нығайтуға мүмкіндік берді. Сонымен қатар бұл шара STEM бағытындағы білім беруді дамытуға және болашақ инженерлердің жаңа буынын қалыптастыруға ықпал ететін маңызды алаң ретінде ерекшеленді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru