• 30 наурыз 2026
• 72

Ректор ғылыми жоба жетекшілерімен кездесті

Қорқыт ата атындағы Қызылорда университетінің Басқарма төрағасы – Ректор Наурызбай Байқадамов ғылыми жоба жетекшілерімен кездесу өткізді. Жиын барысында университетте жүзеге асырылып жатқан ғылыми жобалардың барысы, олардың нәтижелері мен алдағы даму бағыттары жан-жақты талқыланды. 
Кездесу барысында Ректор Мемлекет басшысы Қасым-Жомарт Тоқаевтың кәсіптік, ғылыми және инженерлік-техникалық мамандарды сапалы даярлаудың маңыздылығы туралы айтқан пікірлеріне тоқталды. Президент өз сөзінде Қазақстанды ғылыми-технологиялық тұрғыдан дамыту үшін ғылым мен технологияға басымдық беру қажеттігін атап өткен болатын. 

Ректор өз сөзінде университеттердің елдің зияткерлік әлеуетін қалыптастырудағы ерекше миссиясын атап өтіп, ғылым мен білімнің қазіргі замандағы маңызды өндірістік күшке айналғанын жеткізді. 
Жиында Ғылыми жұмыстар және халықаралық байланыстар жөніндегі проректор Майнура Бурибаева университетте жүзеге асырылып жатқан ғылыми жобалар мен алдағы міндеттер туралы баяндама жасады. Оның айтуынша, 2026 жылы университетте жалпы саны 41 ғылыми жоба жүзеге асырылуда. Бұл жобалар өңірдің әлеуметтік-экономикалық дамуына үлес қосуға бағытталған. 
Кездесу барысында ғылыми жобалардың тиімділігін арттыру, халықаралық әріптестікті кеңейту және ғылыми нәтижелерді коммерцияландыру мәселелері де талқыланды. 

Ғылыми жоба жетекшілері өз кезегінде жүргізіліп жатқан жобалардың негізгі бағыттары мен қол жеткізген нәтижелері туралы баяндап, өз тараптарынан ұсыныстар мен пікірлерін айтты.
Кездесу соңында ректор ғылыми жобаларды одан әрі дамыту бойынша нақты міндеттер жүктеп, ғылыми жұмыстардың тиімділігін арттыру бағытында жүйелі жұмыс жүргізу қажеттігін атап өтті.
Айта кетейік, университетте 1-30 сәуір аралығында Ғылым айлығы өтеді. Аталған айлық аясында ғылыми конференциялар, семинарлар, көрмелер және жас ғалымдардың жобаларын таныстыруға арналған түрлі іс-шаралар ұйымдастырылмақ.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru