• 08 сәуір 2026
• 72

Ғылым айы: Заманауи технологиялар арқылы ресурсты үнемдеу

Қорқыт ата атындағы Қызылорда университетінде  ғылым мен технологияның тоғысқан алаңына айналған маңызды жиын өтті. «Ресурс үнемдейтін технологиялар: заманауи тәсілдер мен даму перспективалары» тақырыбындағы ғылыми-практикалық семинарға университеттің профессор-оқытушылары, жас ғалымдар мен білім алушылар қатысты.

Семинарда  қатысушыларды бүгінгі таңдағы ресурс үнемдеудің стратегиялық маңызымен таныстырып, заманауи IT-шешімдер мен экологиялық жобалардың нақты үлгілерін көрсетті.

Қатысушылардың ерекше қызығушылығын тудырған тақырыптардың бірі – жасанды интеллект пен IoT мүмкіндіктері болды. Сондай-ақ медициналық жобаларда Nocode-платформаларды қолдану арқылы уақыт пен шығынды қалай үнемдеуге болатынын нақты мысалдармен дәлелдеп берді. Машиналық оқыту арқылы медициналық кескіндерді талдап, диагноз қоюды автоматтандыру мәселелері де жан-жақты талқыланды.

Сыр өңірі үшін өзекті күріш шаруашылығы мен су мәселесі де назардан тыс қалмады. Жас ғалымдар мен докторанттар Арал өңірі жағдайында күріш дақылына жұмсалатын суды үнемдеу технологияларын жетілдіру және ауыл шаруашылығы қалдықтарынан пайдалы өнімдер алудың жолдарын ұсынды. Күріш қауызын өңдеп, одан мұнай химиясында қолданылатын катализаторлар алу жобасы жиналғандар тарапынан жоғары бағаланды.

Мұнан бөлек, семинарда  студенттер IoT технологиясына негізделген өздерінің Web-прототиптерін таныстырып, болашақ мамандардың цифрлық әлеуетін көрсетті.

Жиын соңында еркін пікір алмасу форматындағы сұрақ-жауап ұйымдастырылды. Бұл семинар университеттің ғылыми әлеуетін арттырып, жас зерттеушілерге жаңа серпін берген айтулы шара болды.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru