• 10 сәуір 2026
• 80

Ғылым – прогресстің локомотиві

12 сәуір – Ғылым қызметкерлері күніне орай Қорқыт ата университетінде «Әлемді ғылым құтқарады – VI» салтанатты шара өтті. 
Адамзаттың барлық жетістігі – ғалымдардың зияткерлік еңбегінің жемісі екеніне еш дау жоқ. Мерекелік шараға жиналғандар алдымен университеттің зияткерлік қуаты мен болашаққа бастар шамшырағы саналатын ғылыми қызметкерлер ұсынған көрмені тамашалады. 
Ғылым саласында жемісті еңбек етіп жүрген ғалымдардың жетістіктерін дәріптеп, жас зерттеушілерді ынталандыру мақсатында ұйымдастырылған мерекелік жиында алғы сөз университеттің Басқарма төрағасы – Ректор Наурызбай Байқадамовқа берілді. Наурызбай Сейтқалиұлы ғылымды дамыту, жас ғалымдарды қолдау және ғылыми нәтижелерді өндіріске енгізудің маңыздылығына тоқталып, өңірдің ғылыми әлеуетін арттырудағы ұжымның еңбегін атап өтті. 

Салтанатты шарада ғылыми жобаларын жоғары деңгейде жүзеге асырып, іргелі әрі қолданбалы зерттеулермен жүйелі түрде айналысып жүрген бірқатар ғалымдар мен білім алушылар марапатталды. 

Атап айтқанда, университеттің құрметті Ректоры, академик Қылышбай Бисенов «Ахмет Байтұрсынұлы» төсбелгісімен, Қазақ тілі мен әдебиеті және журналистика БББ аға оқытушысы Алдажар Әбілов «Ана тілін дамытуға қосқан үлесі үшін» төсбелгісімен марапатталды. 

Қазақстан Республикасы Ғылым және жоғары білім министрлігінің Құрмет грамотасымен Экономика және құқық институтының директоры Айнұр Исаева, Биология ғылымдарының кандидаты Шолпан Еспенбетова және Философия докторы Нұргүл Сиханова марапатталды. Сондай-ақ, ғылым жолындағы табанды еңбегі мен жоғары жетістіктері үшін бірқатар оқытушылар мен білім алушылар марапат төрінен көрінді.

Мұнан бөлек, шарада серіктес ұйымдар – «Абзал и К» толық серіктестігі, «РУ-6» ЖШС, «ҚазГерМұнай» БК ЖШС, «ПетроҚазақстан Құмкөл Ресорсиз» АҚ тарапынан да жас ғалымдарға қолдау көрсетіліп, биология білім беру бағдарламасының магистранттары мен студенттеріне алғыс хаттар мен арнайы сыйлықтар табысталды.

Бұл – тек жеке жетістіктің емес, тұтас ғылыми қауымдастықтың мәртебесін көтеретін маңызды қадам. Саланың қоғамдағы орнын айқындап қана қоймай, жас буынға үлкен серпін беретін айтулы оиға. Өйткені ғылымға жасалған әрбір қолдау – елдің ертеңіне салынған инвестиция.
Ғылым мен білім насихатталған шара концерттік бағдарламамен өріліп, дәстүрлі әуендермен қатар патриоттық әндер шырқаған өнерпаздар көрермендердің ыстық ықыласына бөленді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru