• 23 сәуір 2026
• 123

ЖАС САЙЛАУШЫЛАР КЛУБЫНЫҢ ДӘРІСХАНАСЫ АШЫЛДЫ

Қорқыт ата атындағы Қызылорда университетінде Орталық сайлау комиссиясының Төрағасы Нұрлан Әбдіров жастармен кездесті. Жиынға 400-ден астам жас сайлаушы қатысты. «Жастар және сайлау» республикалық форумы аясында ашық пікір алмасу форматында өткен басқосуда халықтық таңдау үдерісінің өзекті мәселелері кеңінен талқыланды.
Мән-маңызы ерек жиында университеттің Басқарма төрағасы – Ректор Наурызбай Байқадамов «Заң мен тәртіп» қағидаты аясында сайлау заңнамасын нақты іске асыру тетіктерін саралап өтті. Сонымен қатар сайлау үдерісіне қатысатын сайлаушылардың кәсіби әлеуетін арттыру және ғылым мен практиканың өзара байланысын күшейту аса маңызды екенін жеткізді.
Іс-шараға Орталық сайлау комиссиясының өкілдері, еліміздің барлық өңірлерінен  Жас сайлаушылар клубтарының мүшелері, облыстардың, Астана, Алматы және Шымкент қалаларының аумақтық сайлау комиссияларының төрағалары, сондай-ақ Қызылорда облысының сайлау комиссияларының мүшелері қатысты. 

Форум барысында Қорқыт ата атындағы Қызылорда университетінің ректоры Наурызбай Байқадамов пен Қызылорда облыстық аумақтық сайлау комиссиясының төрағасы Әділбек Ерсұлтанов ынтымақтастық туралы меморандумға қол қойды.
Нұрлан Әбдіров өз сөзінде сайлау үдерісін ұйымдастырудың басты бағыттарына тоқталып, еліміздегі сайлау органдарының қызметі, Орталық сайлау комиссиясы жанындағы диалог алаңдарының жұмысы және халықаралық ынтымақтастық мәселелерін атап өтті. Сонымен қатар, жастардың электоралдық мәдениетін қалыптастыру сұрақтарына айрықша мән берілді. 
Кездесу сұрақ-жауап форматында жалғасып, қатысушылар сайлауды ұйымдастырудағы халықаралық тәжірибе, сайлау үдерісін цифрландыру және сайлау комиссиялары мүшелерін даярлау мәселелерін талқылады.
Бұдан бөлек, кездесуге қатысушылар электоралдық күн тәртібіндегі өзекті мәселелерге қатысты, оның ішінде ЕҚЫҰ ДИАҚБ ұсынымдарын қамтитын онлайн-сауалнамаға белсене атсалысты.
Еліміздің әр өңірінен келген қатысушылар бас қосқан жиынның маңызды жаңалықтарының бірі – Қорқыт ата атындағы Қызылорда университетінде Жас сайлаушылар клубының дәрісханасы ашылды. Арнайы жабдықталған бұл аудиторияда студенттер «Сайлау құқығы» пәнін терең меңгеріп, сайлау комиссиялары өкілдерінің қатысуымен өтетін қонақ дәрістері мен тәжірибелік кездесулерге қатысуға мүмкіндік алады.

Жиын аясында белсенді қатысушыларға Қазақстан Республикасы Орталық сайлау комиссиясының бастамасымен әзірленген электоралдық тақырыптағы басылымдар табысталды. Сондай-ақ бұл еңбектердің даналары университеттің кітапхана қорына да берілді. 
Форум қатысушылары Қызылорда облысы мен Қызылорда қалалық аумақтық сайлау комиссияларының қызметін қамтамасыз етуге арналған жаңартылған ғимаратпен танысты.
Іс-шара аясында болашақ сайлаушылардың жобалары көрмеге қойылып, мектеп президентін сайлау үлгілері, сондай-ақ электоралдық тақырыптағы 3D-графика және сәндік-қолданбалы өнер туындылары көпшілік назарына ұсынылды.
Сонымен бірге «Daryn AI» онлайн-ассистенті таныстырылды. Бұл сервис сайлау учаскесін іздеуге арналған қосымшаға біріктірілген болып, сайлаушылардың негізгі сұрақтарына мәтіндік әрі аудио форматта жауап береді. 
Бұдан өзге, «Электоралдық науқандардың өзекті мәселелері: тәжірибелік талдау және бағдарламалық міндеттер» тақырыбында республикалық көшпелі семинар өткізілді. Жиын барысында сайлау науқандарының негізгі бағыттары жан-жақты сараланып, практикалық мәселелер талқыланды. Сондай-ақ республикалық референдумды ұйымдастыруға үлес қосқан қатысушылар арнайы марапаттарға ие болды.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru