• 24 сәуір 2026
• 57

ҚҰМКӨЛДІҢ 40 ЖЫЛДЫҚ ТАРИХЫ КІТАПҚА АЙНАЛДЫ

Қорқыт ата атындағы Қызылорда университетінде «Әлемді ғылым құтқарады – IV ғылым айы» аясында тағылымы терең, мазмұны бай рухани кеш өтті. Бұл жиында Сыр өңірінің мақтанышына айналған тұлға, мұнай-газ саласының алғашқы кәсіби мамандарының бірі Ғалым Баймановқа арналған кітап қалың оқырманға жол тартты. 

Бұл еңбек Құмкөл кенішін игерудің 40 жылдық белесін қорытындылаған, уақыт сүзгісінен өткен естеліктер мен деректерге негізделген құнды дүние. Шара барысында Қазақстан Жазушылар одағының мүшесі Қали Омаров сөз алып, Ғалым Баймановтың өнегелі өмір жолы мен шығармашылық қырлары жайында тебірене әңгімеледі. Оның айтуынша, Ғалым Байманов – тек өндіріс майталманы ғана емес, терең ойлы, рухани биіктігі жоғары тұлға.

Кітап авторы Нұрлыбек Мыңжас өз сөзінде мұнай өнеркәсібінің қалыптасу кезеңдеріне тоқталып, Ғалым Баймановтың осы саладағы алғашқы қарлығаштардың бірі екенін ерекше атап өтті. Ол Баймановтың өмір жолын табандылық пен ізденіске құрылған тағдыр деп сипаттап, оның күнделіктері арқылы жинақталған өмірлік тәжірибесі бүгінгі еңбектің өзегіне айналғанын жеткізді. «Бұл – жай ғана жазбалар емес, бұл – мақсат пен мұраттың, еңбек пен ізденістің күнделігі», – деді автор.

Кеш барысында Жазушылар одағының мүшесі Жұмабай Құлиев жүрекжарды жырын арнап, «Сыр бойынан түлеп ұшқан сұңқарым» атты өлеңін оқыды. Сонымен қатар, Құмкөл кен орнын игеруге үлес қосқан ардагерлер құрметпен аталып, сөз кезегі алғашқы ашушылардың бірі Қабылбек Қыстаубаевқа берілді. Ол өз сөзінде кеніштің 40 жылдық тарихындағы қиындықтар мен жетістіктерді еске алып, кітап авторларының еңбегіне алғыс білдірді.

Тағылымды кездесуде «Аманат» партиясы облыстық филиалының төрағасы Жандос Базартай да сөз сөйлеп, өңірде ұлттық кітапхана құрылысының басталғанын атап өтті. Ол бұл шараны кітап күні қарсаңындағы игі бастамалардың жалғасы деп бағалап, авторлардың еңбегіне жоғары баға берді.

Шараға энергетика саласының ардагерлері, мұнайшылар, сала мамандары мен зиялы қауым өкілдері қатысты. Олардың қатарында Мұхит Кәрімбаев, Серік Ажаров, Қабылбек Қыстаубаев, Ғалым Құрманбаев, Жұмабай Құлиев және басқа да құрметті қонақтар болды. Сонымен бірге геология мамандығында білім алып жатқан студенттер де қатысып, тағылымды әңгімеден рухани азық алды.

Кеш соңында кітаптың салтанатты тұсаукесері болып, жиылғандар рухани олжамен қауышып, еңбектің алғашқы даналарын ыстық ықыласпен қабыл алды. Бұл еңбек – тек бір тұлғаның өмір жолы ғана емес, тұтас бір дәуірдің шежіресі, Сыр мұнайының тарихы мен тағдырына арналған құнды мұра ретінде бағаланды.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru