• 27 сәуір 2026
• 31

ҚОРҚЫТ АТА УНИВЕРСИТЕТІНІҢ СТУДЕНТТЕРІ ХАЛЫҚАРАЛЫҚ КОНФЕРЕНЦИЯДА ЖҮЛДЕЛІ ОРЫНДАРҒА ИЕ БОЛДЫ

Қорқыт ата атындағы Қызылорда университетінің студенттері Ж.Баласағын атындағы Қырғыз Ұлттық университетінің Заң институтында өткен «Қырғыз Республикасының қылмыстық-процестік саясаты: оңтайландырудың тұжырымдамалық негіздері және заманауи сын-қатерлерге қарсы іс-қимыл» тақырыбындағы халықаралық ғылыми-тәжірибелік конференцияға қатысып, жоғары нәтижелер көрсетті.
Халықаралық деңгейдегі ғылыми жиында университет студенттері секциялық отырыстарда өз ғылыми баяндамаларын ұсынып, өзекті тақырыптарды көтере білді. Нәтижесінде бірқатар білім алушылар жүлделі орындарға ие болды.

Атап айтқанда, «Қырғыз Республикасының қылмыстық-құқықтық және процестік заңнамасының негіздері» атты 1-секция бойынша І орынды «Қылмыстық сот ісін жүргізудегі адвокаттың қатысуын жетілдіру» тақырыбында баяндама жасаған Мадина Серік иеленді. Оның ғылыми жетекшісі – «Құқықтану» білім беру бағдарламасының аға оқытушысы, заң ғылымдарының магистрі Алия Мүйденова.
ІІ орынды «Қылмыстық процестегі цифрлық дәлелдемелердің құқықтық рөлі» тақырыбында баяндама жасаған Ақжан Әділхан еншіледі. Ғылыми жетекшісі – «Құқықтану» білім беру бағдарламасының жетекшісі, заң ғылымдарының магистрі, аға оқытушы Еркемай Саниязова.

Сонымен қатар, Айғаным Шалқыма «Педофилия ісі бойынша күдікті мен жәбірленушіден жауап алу кезінде психологиялық тәсілдерді қолдану» тақырыбында баяндама жасап, ғылыми ортада өзекті мәселелердің бірін талқылады. Ғылыми жетекшісі – заң ғылымдарының кандидаты, аға оқытушы Ляззат Қаржаубаева.
«Қазіргі кезеңдегі криминалистика ғылымы мен сот сараптамасының дамуы» тақырыбындағы 2-секцияда Наргиз Райымбек «Қылмыстарды тергеу кезіндегі бейнебақылау мен тұлғаны танудың криминалистикалық маңызы» тақырыбында баяндама жасап, ІІ орынға ие болды. Оның ғылыми жетекшісі – университеттің криминалистикалық зертханасының меңгерушісі Марат Садықов.
Айта кету керек, студенттердің халықаралық ғылыми-тәжірибелік конференцияларға қатысуы олардың ғылыми әлеуетін арттырып қана қоймай, тәжірибе алмасуына, кәсіби біліктілігін шыңдауға және халықаралық академиялық байланыстарды нығайтуға ықпал етеді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru