• 28 сәуір 2026
• 90

ҚОРҚЫТ АТА УНИВЕРСИТЕТІНДЕ IV ХАЛЫҚАРАЛЫҚ ОЛИМПИАДА ӨТТІ

Қорқыт ата атындағы Қызылорда университетінде педагогикалық мамандықтар студенттері арасында жаратылыстану пәндері бойынша IV халықаралық олимпиада өтті. Білім бәйгесіне Қазақстанмен қатар, Өзбекстан және Қырғызстан елдерінің жоғары оқу орындарынан келген дарынды студенттер қатысты.
Олимпиаданың басты мақсаты – «В013 – Биология мұғалімдерін даярлау», «В014 – География мұғалімдерін даярлау» және «В012 – Химия мұғалімдерін даярлау» білім беру бағдарламалары бойынша білім алушы студенттердің шығармашылық әлеуетін анықтап, қолдау көрсету, олардың интеллектуалдық капиталын дамытуға ықпал ету. Сонымен қатар, жастардың ғылыми-педагогикалық қызметке қызығушылығын арттырып, заманауи ғылыми мәселелерді шешуге белсенді қатысуына жағдай жасау көзделді.

Іс-шараның ашылуында Басқарма төрағасы – Ректор Наурызбай Байқадамов құттықтау сөз сөйлеп, қатысушыларға сәттілік тіледі. 
Байқауға жалпы саны 14 жоғары оқу орнының студенттері қатысып, олардың ішінде 4 университет Өзбекстаннан, 2 университет Қырғызстаннан келген. Олимпиада үш кезең бойынша ұйымдастырылды. Алғашқы кезең – «Педагогика бізді біріктіреді» атты командалық таныстыру, онда қатысушылар өз оқу орындары мен мамандықтарын таныстырды. Екінші кезеңде студенттер мамандықтарына қатысты проблемалық тақырыпта аналитикалық эссе жазды. Үшінші кезеңде педагогикалық жағдаяттарға талдау жасап, практикалық шешімдер ұсынды.

Жалпы командалық есеп бойынша І орынды Абай атындағы Қазақ ұлттық педагогикалық университеті иеленіп, 150 мың теңгелік сертификатпен марапатталды. ІІ орын Өзбекәлі Жәнібеков атындағы Оңтүстік Қазақстан педагогикалық университеті мен Низами атындағы Өзбекстан ұлттық педагогикалық университетіне бұйырып, әрқайсысы 100 мың теңгелік сертификаттарға ие болды. ІІІ орынды Қорқыт ата атындағы Қызылорда университеті, Қазақ ұлттық қыздар педагогикалық университеті және Захириддин Мұхаммед Бабыр атындағы Әндіжан мемлекеттік университеті иеленіп, 50 мың теңгелік сертификаттармен марапатталды.  

Пәндік бағыттар бойынша да үздіктер анықталды. Химия мамандығы бойынша І орынды Әлкей Марғұлан атындағы Павлодар педагогикалық университеті, ІІ орынды И. Арабаев атындағы Қырғыз мемлекеттік университеті, ІІІ орынды М. Әуезов атындағы Оңтүстік Қазақстан университеті иеленді.  
География мамандығы бойынша І және ІІ орындар Термез мемлекеттік университетіне бұйырса, ІІІ орынды Халел Досмұхамедов атындағы Атырау университеті иеленді.  

Биология бағыты бойынша І орынды М. Әуезов атындағы Оңтүстік Қазақстан университеті, ІІ орынды М. Қозыбаев атындағы Солтүстік Қазақстан университеті, ІІІ орынды Шерхан Мұртаза атындағы Халықаралық Тараз университеті иеленді.
Олимпиада қорытындысы бойынша қатысушылармен қатар, оларды дайындаған оқытушылар да арнайы марапаттарға ие болды. Ауқымды білім бәйгесі жас педагогтардың кәсіби біліктілігін арттырып, халықаралық тәжірибе алмасуға жол ашқан маңызды алаңға айналды.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru