• 30 сәуір 2026
• 66

ҒАЛЫМ БОЛАТ ТЕМИРОВКЕ АРНАЛҒАН ҒЫЛЫМИ-ПРАКТИКАЛЫҚ СЕМИНАР ӨТТІ

Қорқыт ата атындағы Қызылорда университетінде техника ғылымдарының кандидаты, доцент Болат Темировтің ғылыми-педагогикалық қызметіне арналған «Қызылорда облысындағы су тапшылығы жағдайында күріш мелиорациясының эволюциясы және қазіргі жағдай» тақырыбында ғылыми-практикалық семинар өтті.

Іс-шараны модератор Майнура Бурибаева ашып, қатысушыларға семинардың маңыздылығын атап өтті. Оның айтуынша, су ресурстарын тиімді пайдалану және күріш шаруашылығын дамыту мәселелері бүгінгі таңда өзекті тақырыптардың бірі болып табылады.

Семинар барысында еліміздің белгілі ғалымдары мен сала мамандары Болат Темировтің ғылым мен білім саласына қосқан үлесіне жоғары баға берді. Атап айтқанда, Қызылорда ашық университетінің ректоры, техника ғылымдарының докторы, профессор, ҚР Ұлттық ғылым академиясының академигі Қылышбай Бисенов, университет ардагері, техника ғылымдарының докторы, профессор Серікбай Қошқаров, Ы.Жахаев атындағы Қазақ күріш шаруашылығы ғылыми-зерттеу институтының басқарма төрағасы, техника ғылымдарының докторы, академик Сұлтанбек Тәуіпбаев, аталған институттың бас ғылыми қызметкері, техника ғылымдарының докторы, академик Құрманбек Бакиров және басқа да ғалымдар профессордың ғылыми еңбектері мен педагогикалық қызметі туралы мазмұнды баяндама жасады.

Сондай-ақ, техника ғылымдарының докторы, профессор Ондабек Рабат, «Болашақ» Қызылорда университетінің профессоры Өмірбек Үмбетов, Қорқыт ата атындағы Қызылорда университетінің профессоры, ауыл шаруашылығы ғылымдарының докторы Ибадулла Таутенов, қауымдастырылған профессор Ысқақ Ермағанбет, «ТУРГАЙ-ПЕТРОЛЕУМ» АҚ-нің коммерциялық директоры Айбек Абызбай және университеттің Директорлар кеңесінің корпоративтік хатшысы Ақмарал Темирова да ғалымның өмір жолы мен еңбектеріне тоқталды.

Жиын барысында Болат Темировтің ғылыми және шығармашылық өміріне арналған арнайы бейнеролик көрсетілді. Сонымен қатар, «Эксплуатация картовых оросительных и сбросных каналов рисовых систем Кызылординской области» атты монографиясының тұсаукесер рәсімі өтті.

Айта кету керек, Болат Темиров ұзақ жылдар бойы Қорқыт ата атындағы Қызылорда университетінде (бұрынғы Қызылорда политехникалық институты) қызмет атқарып, Құрылыс және мелиоративті машиналар кафедрасының меңгерушісі, Механика факультетінің деканы қызметтерін абыроймен атқарған. Ғалымның ғылыми қоржынында 31 ғылыми еңбек пен 10 әдістемелік жұмыс бар.

Шараға университеттің профессор-оқытушылар құрамы, ғалымның әріптестері, шәкірттері мен студенттер қатысып, оның ғылымдағы және ұстаздық жолындағы еңбегіне құрмет көрсетті.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru