• 13 мамыр 2026
• 70

СЕЛЬЧУК УНИВЕРСИТЕТІНІҢ СТУДЕНТТЕРІ ҚОРҚЫТ АТА УНИВЕРСИТЕТІНДЕ БІЛІМ АЛДЫ

Қорқыт ата атындағы Қызылорда университетінде халықаралық академиялық ұтқырлық бағдарламасы аясында Түркия Республикасының Сельчук университетінен келген білім алушылар Тарих білім беру бағдарламасы бойынша білім алып, кәсіби және ғылыми тәжірибелерін халықаралық деңгейде жетілдірді.

Бағдарлама барысында студенттер «Орта ғасырдағы Шығыс және Батыс» пәні бойынша дәрістерге белсенді қатысып, тарихи кезеңдердің ерекшеліктерін салыстырмалы тұрғыда талдады. Сонымен қатар, олар Шығыс пен Батыс өркениеттерінің өзара ықпалы, тарихи дамуы мен мәдени байланыстары туралы терең білім алды.

Оқу үдерісі аясында білім алушылар ғылыми пікірталастарға қатысып, өз ойларын еркін жеткізу, сараптау және зерттеу дағдыларын дамытты. Бұл олардың академиялық ізденісін арттырып қана қоймай, халықаралық білім беру кеңістігіндегі тәжірибесін кеңейтуге мүмкіндік берді.

Сондай-ақ, студенттер университеттің академиялық ортасымен танысып, профессор-оқытушылар құрамымен тәжірибе алмасты. Мәдени және білім беру бағытындағы түрлі іс-шараларға қатысу арқылы олардың халықаралық ортаға бейімделуі мен кәсіби көкжиегінің кеңеюіне жол ашылды.

Бағдарлама қорытындысы бойынша қатысушылар оқу бағдарламасын сәтті аяқтап, арнайы қатысу куәліктеріне ие болды.

Халықаралық академиялық ұтқырлық – бұл тек білім алмасу ғана емес, сонымен қатар мәдениеттер үндестігін нығайтып, жаңа достықтар мен болашақтағы серіктестіктерге бастау болатын маңызды мүмкіндік. Қорқыт ата атындағы Қызылорда университеті алдағы уақытта да халықаралық ынтымақтастықты дамытып, білім алушыларға жаңа мүмкіндіктер ұсынуды жалғастыра береді.

Қорқыт ата атындағы Қызылорда университетінің медиа орталығы
Байланыс телефоны: 8(7242) 26-21-34
 e-mail: media_korkyt@mail.ru