• 15 мамыр 2026
• 81

БОЛАШАҚ ЗАҢГЕРЛЕРГЕ ТӘЖІРИБЕ АЛАҢЫ: СОТ САРАПТАМАСЫНЫҢ МАҢЫЗЫ ТАЛҚЫЛАНДЫ

Қорқыт ата атындағы Қызылорда университетінде «Сот сараптамасының ғылыми-теориялық негіздерінің 75 жылдық даму нәтижесі» атты дөңгелек үстел өтті. Басқосуды университеттің «Құқықтану» білім беру бағдарламасы ұйымдастырды.

Жиында «Құқықтану» білім беру бағдарламасының жетекшісі Еркемай Саниязова сөз сөйлеп, сот сараптамасы саласының маңызына, жетістіктері мен даму бағыттарына тоқталды. Сонымен қатар, дуальді білім беру жүйесінің тиімділігі мен болашақ мамандарды даярлаудағы рөлін атап өтті.

Шараның ашылуында университеттің Басқарма мүшесі – Ғылыми жұмыстар және халықаралық байланыстар жөніндегі проректор Майнура Бурибаева сот сараптамалары институтының тарихы мен құрылымы туралы айтып, Қорқыт ата атындағы Қызылорда университеті мен сот сараптамалары институты арасындағы тығыз байланысты ерекше атап өтті. Бүгінде университеттің Құқықтану мамандығында 500-ге жуық білім алушы білім алады. Олардың басым бөлігі өндірістік тәжірибеден сот сараптамалары институтында өтіп, кәсіби біліктілігін шыңдауда.

Дөңгелек үстелде Қызылорда облысы Сот сараптамалары институтының директоры Ержан Примбетов «Сот сараптамасының дамуы: 75 жылдық тәжірибе мен сабақтастық» тақырыбында баяндама жасап, еліміздегі 17 облыстық және 3 қалалық сот сараптамасы мекемелерінің қызметі мен сот сарапшыларының жұмысына тоқталды.

Сондай-ақ, институт директорының орынбасары Азамат Урналиев «Қылмыстарды ашу мен тергеудегі өрт сараптамасының жетістіктері» тақырыбында баяндама жасап, сарапшы қызметіндегі басты қағидалардың бірі – тәуелсіздік екенін атап өтті. Ол сот сараптамасы саласын одан әрі дамыту қажеттігін жеткізді.

Жиын барысында Қызылорда облысы Сот сараптамалары институтының сот медицинасы бойынша директор орынбасарының міндетін атқарушы Серик Токатаев пен Қорқыт ата атындағы Қызылорда университетінің аға оқытушысы, заң ғылымдарының кандидаты Ғанибек Сырмағанбетұлы тергеу мен сот сараптамасының өзара байланысы, сондай-ақ қазіргі қылмыстық істерді тергеудегі сот медицинасының рөлі жөнінде баяндама жасады.

Университеттің криминалистика оқу-зерттеу зертханасының меңгерушісі Марат Садыков «Возможности учебно-исследовательской криминалистической лабараторий в учебном процессе» тақырыбында баяндамасын оқыды. 
Сонымен қатар, жақында республикалық хакатонда ІІ орын иеленген Экономика және құқық институты мен Жасанды интеллект институтының студенттері «Цифрлық дәлелдемелер және оларды құқықтық қолдану аспектілері» тақырыбындағы жобаларын таныстырды. 
Шара соңында Қорқыт ата атындағы Қызылорда университетінің аға оқытушысы Серік Можанов жиынды қорытындылап, қатысушылар арасында пікір алмасу өтті.  Дөңгелек үстел барысында сот сараптамасы саласының ғылыми-тәжірибелік маңызы кеңінен талқыланып, сала мамандары мен жас ғалымдар арасында тәжірибе алмасуға мүмкіндік жасалды.

 
Қорқыт ата атындағы Қызылорда университетінің медиа орталығы