• 04 маусым 2026
• 90

«ECOLIFE» ЭКОКЛУБЫ 5 МИЛЛИОН ТЕҢГЕЛІК ЖҮЛДЕГЕ ИЕ БОЛДЫ

Қорқыт ата атындағы Қызылорда университетінің «Ecolife» экологиялық клубы Астанада өткен ReStart экологиялық жобасының 10-маусымдық финалында І орын иеленіп, 5 000 000 теңге көлеміндегі жүлде қорына қол жеткізді. Қаражат пластик қалдықтарын өңдеуге арналған жабдықтар кешенін сатып алуға бағытталады.
Coca-Cola İçecek Kazakhstan компаниясының қолдауымен ұйымдастырылған жобаға еліміздің 23 жоғары оқу орнының командалары қатысты. Маусым барысында қатысушылар экологиялық акциялар өткізіп, пластик қалдықтарын жинау және сенбіліктер ұйымдастыру арқылы белсенділік танытты.

Финалдық кезеңде «Ecolife» клубы үздік нәтиже көрсетіп, жеңімпаз атанды. Биылғы маусымда қатысушылар бірлескен жұмыстың нәтижесінде 60 тоннадан астам PET-1 пластигін жинап, рекордтық көрсеткішке қол жеткізді.

Клубтың бұл жетістігі университеттегі экологиялық мәдениетті дамыту бағытындағы жүйелі жұмыстың нәтижесі болып табылады. Сондай-ақ ол жастардың қоршаған ортаға деген жауапкершілігі мен белсенді ұстанымын айқындайды.
Қорытынды іс-шараға университеттің «Электр энергетикасы, техносфералық қауіпсіздік және экология» білім беру бағдарламасының аға оқытушысы, «Ecolife» клубының негізін қалаушы әрі жетекшісі Светлана Кужамбердиева және «Экология және табиғатты пайдалану» бағдарламасының студенті, белсенді экоерікті Жібек Ақнұрова қатысты.
Айта кетейік, 5 маусым – Дүниежүзілік қоршаған ортаны қорғау күні. Қоршаған ортаны қорғау бағытында университеттің қызметкерлері мен студенттері «Таза Қазақстан» ұлттық жобасы аясындағы экологиялық бастамаларға белсене атсалысып келеді. Бұл игі істер экологиялық мәдениетті қалыптастыруға және табиғатқа жауапкершілікпен қарауға ықпал етуде.

Қорқыт ата атындағы Қызылорда университетінің медиа орталығы