• 05 маусым 2026
• 61

«ОРХУН» БАҒДАРЛАМАСЫ: СТУДЕНТТЕР ТҮРКИЯДА БІЛІМ АЛУДА

Қорқыт ата атындағы Қызылорда университетінің студенттері халықаралық «Орхун» бағдарламасы аясында Түркия Республикасының Кония қаласындағы Сельчук университетінде білім алуда.
Шетелдік жоғары оқу орнында «Педагогика, психология және бастауыш оқыту әдістемесі» білім беру бағдарламасының студенті Ағиса Тұрған, сондай-ақ «Дене шынықтыру және бастапқы әскери дайындық» білім беру бағдарламасының студенттері Ақжан Байдосова мен Айкен Бақытжанқызы бір семестр бойы білімдерін жетілдіруде.

Халықаралық бағдарлама студенттерге халықаралық білім беру ортасында тәжірибе жинақтауға, кәсіби құзыреттіліктерін дамытуға және заманауи оқыту әдістерін меңгеруге мүмкіндік береді. Сонымен қатар, қатысушылардың шет тілін меңгеру деңгейін арттырып, мәдениетаралық қарым-қатынас дағдыларын қалыптастыруға ықпал етеді.
Академиялық ұтқырлық аясында студенттер білім алып қана қоймай, Түркияның мәдениеті мен дәстүрін жақыннан тануға мүмкіндік алуда. Бұл олардың дүниетанымын кеңейтіп, болашақ маман ретінде жан-жақты дамуына жол ашады.

Студенттердің айтуынша, шетелдік университетте оқу жаңа ортаға бейімделуге, өз бетінше шешім қабылдауға және халықаралық тәжірибе жинақтауға үлкен септігін тигізуде.
Айта кетейік, «Орхун» бағдарламасы түркі мемлекеттерінің жоғары оқу орындары арасындағы ынтымақтастықты нығайтып, студенттердің академиялық және мәдени байланыстарын дамытуға бағытталған халықаралық білім беру жобаларының бірі болып табылады.

Қорқыт ата атындағы Қызылорда университетінің медиа орталығы