• 10 маусым 2026
• 86

ШЫМКЕНТТЕ «ТАЛАПКЕР-2026» КӘСІБИ НЕТВОРКИНГ-КЕЗДЕСУІ ӨТТІ

Шымкент қаласында «Талапкер-2026: мүмкіндіктер мен қауіптер» тақырыбында кәсіби нетворкинг-кездесу өтті.
Жиынның мақсаты – білім беру қауымдастығымен байланыс орнатып, талапкерлерге кәсіби бағдар беру бойынша ынтымақтастықты дамыту. Іс-шараға профориентологтар, грант аналитиктері және білім беру саласының мамандары қатысты. Кездесу барысында университет өкілдері талапкерлерге кәсіби бағдар беру, 2026 жылғы қабылдау ерекшеліктері, мемлекеттік гранттар және жаңа білім беру бағдарламалары туралы ақпарат ұсынды.

Сондай-ақ, IT бағытына бөлінген мемлекеттік гранттар, Жасанды интеллект институтының мүмкіндіктері және талапкерлерді сапалы ақпаратпен қамту мәселелері талқыланды. 
Айта кетейік, нетворкинг-кездесу университеттің Шымкент қаласында ашылған кеңсесінде ұйымдастырылды. Маусым-шілде айларында кеңсе қызметі негізінен кәсіби бағдар беру, талапкерлерді оқуға шақыру және қабылдау науқанына қолдау көрсетуге бағытталады.

Қорқыт ата атындағы Қызылорда университетінің медиа орталығы