• 12 маусым 2026
• 13

ЗЕРТТЕУДЕН ӨНДІРІСКЕ ДЕЙІН: ҒАЛЫМДАРҒА АРНАЛҒАН СЕМИНАР ӨТТІ

Қорқыт ата атындағы Қызылорда университетінің қызметкерлері ғылыми жобаларды коммерцияландыру бойынша республикалық семинарға қатысты.

Алматы қаласында 11–12 маусым күндері  «Ұлттық мемлекеттік ғылыми-техникалық сараптама орталығы» АҚ ұйымдастыруымен «Ғылыми идеядан ғылыми-техникалық жобалар мен бағдарламаларды коммерцияландыруға дейінгі жол» тақырыбында республикалық оқыту семинары өтті. Аталған іс-шараға оқу орнының Коммерцияландыру бөлімінің басшысы Нұржан Едилбаев пен «Физика-химиялық талдау әдістері» инженерлік бейіндегі зертханасының ғылыми қызметкері Рахметулла Жаппарбергенов қатысты.

Семинар барысында ғылыми және ғылыми-техникалық жобаларды гранттық және бағдарламалық-нысаналы қаржыландыру конкурстарына ұсыну тетіктері, ғылыми нәтижелерді мемлекеттік есепке алу, Ұлттық ғылыми кеңестер қызметінің басым бағыттары, сондай-ақ ғылыми жобалар мен коммерцияландыру үдерістерін мониторингтеу мәселелері кеңінен талқыланды. Қатысушылар ғылыми-техникалық ақпараттық ресурстарды тиімді пайдалану мүмкіндіктерімен танысып, ғылыми зерттеулердің нәтижелерін өндіріске енгізу тәжірибелері бойынша пікір алмасты.

Сонымен қатар, семинар аясында жас ғалымдардың перспективалық жобалары таныстырылып, ғылым мен өндіріс арасындағы байланысты нығайтуға бағытталған бастамалар талқыланды.
Мұндай оқыту алаңдары ғылыми зерттеулердің тиімділігін арттыруға, ғылыми нәтижелерді коммерцияландыру тетіктерін жетілдіруге және университеттің инновациялық әлеуетін дамытуға ықпал етеді.

Қорқыт ата атындағы Қызылорда университетінің медиа орталығы