• 03 шілде 2026
• 12

УНИВЕРСИТЕТ СТУДЕНТТЕРІ ALMATY TECH CUP XII ХАЛЫҚАРАЛЫҚ ЧЕМПИОНАТЫНЫҢ ЖЕҢІМПАЗЫ АТАНДЫ

Қорқыт ата атындағы Қызылорда университетінің студенттері Орталық Азиядағы ең ірі инженерлік және робототехника жарыстарының бірі – Almaty Tech Cup XII халықаралық технологиялық чемпионатында жоғары нәтиже көрсетіп, RoboCup Rescue санаты бойынша І орынды жеңіп алды.

Almaty Tech Cup XII – Алматы қаласы әкімінің кубогына арналған робототехника, бағдарламалау, жасанды интеллект, киберқауіпсіздік және инженерлік технологиялар бойынша халықаралық ашық чемпионат. Биыл «Age of AI» («Жасанды интеллект дәуірі») тақырыбымен өткен байқау Алматы қаласындағы Almaty Arena спорт кешенінде ұйымдастырылды.

Ауқымды додаға Қазақстанның барлық өңірлері мен Орталық Азия елдерінен 3000-нан астам қатысушы мен 400-ге жуық команда қатысып, 14 технологиялық бағыт бойынша бақ сынады.

Қорқыт ата университетінің Әлижан Шәріпжан, Аян Ахметкәрім және Ернұр Қанаттан құралған командасы RoboCup Rescue бағыты бойынша автономды роботтарды бағдарламалау, күрделі кедергілерден өту, навигация жүйесін әзірлеу, сенсорларды тиімді пайдалану және құтқару тапсырмаларын орындау кезеңдерінде жоғары нәтиже көрсетіп, І орынға ие болды.

Аталған жетістік студенттердің инженерлік ойлау қабілеті, бағдарламалау шеберлігі, командалық үйлесімі және күрделі мәселелерді тиімді шешу дағдыларының жоғары деңгейде екенін дәлелдейді.

Қорқыт ата атындағы Қызылорда университетінің медиа орталығы