• 03 шілде 2026
• 21

ПЕДАГОГИКА ЖӘНЕ ДӘСТҮРЛІ ӨНЕР ИНСТИТУТЫНЫҢ ТҮЛЕКТЕРІНЕ ДИПЛОМ ТАБЫСТАЛДЫ

Қорқыт ата атындағы Қызылорда университетінде Педагогика және дәстүрлі өнер институтының бітіруші түлектеріне диплом табыстау рәсімі өтті.

Салтанатты жиынға Қызылорда облысы әкімінің орынбасары Мейрамбек Шермағанбет, университеттің Басқарма төрағасы – Ректор Наурызбай Байқадамов, «Әділет» партиясы Қызылорда облыстық филиалының басшысы Жандос Базартай, Қазақстанның еңбек сіңірген қайраткері, «Құрмет» орденінің иегері, Қызылорда облысының Құрметті азаматы, Қорқыт ата атындағы Қызылорда университетінің Құрметті профессоры, сазгер Рамазан Тайман, Экономика және қаржы департаментінің директоры, экономика ғылымдарының кандидаты Нұрлан Уразбаев қатысып, түлектерге ізгі тілектерін білдірді.

Салтанатты рәсім барысында оқу озаттарына дипломдар табысталып, оқу мен қоғамдық өмірде белсенділік танытқан түлектерге құрмет көрсетілді. Сондай-ақ, институттың шығармашылық ұжымдары мерекелік концерттік бағдарлама ұсынып, кештің сәнін келтірді. 

Айта кетейік, биыл институт бойынша 43 түлек үздік диплом иегері атанды. Сонымен қатар, 10 студент Қазақстан Республикасы Президенті белгілеген стипендияның иегері болды. Институттың жүздеген білім алушысы халықаралық академиялық ұтқырлық бағдарламасы аясында Шығыс Азия, Еуропа және Таяу Шығыстың жетекші жоғары оқу орындарында білім алып, халықаралық тәжірибе жинақтады.

Қорқыт ата атындағы Қызылорда университетінің медиа орталығы