• 27 шілде 2026
• 75

ҚОРҚЫТ АТА УНИВЕРСИТЕТІНІҢ ОҚЫТУШЫЛАРЫ ЖАҢА ТЕХНОЛОГИЯЛАРДЫ МЕҢГЕРУДЕ

Қорқыт ата атындағы Қызылорда университетінің оқытушылары Қытай Халық Республикасында өтіп жатқан халықаралық семинарға қатысуда.
«Информатика және АКТ» білім беру бағдарламасының аға оқытушысы Бақыткүл Жарменова мен «Компьютерлік ғылымдар» білім беру бағдарламасының оқытушысы Ғалымжан Кажымұрат Ухань қаласындағы «Дамушы елдерге арналған зияткерлік байланыстырылған көлік индустриясын дамыту» атты халықаралық семинардың қатысушылары қатарында.

Семинарды Ухань пошта және телекоммуникациялар ғылыми-зерттеу институты ұйымдастырған. Бағдарлама дамушы елдердің мамандарын біріктіріп, озық технологиялар саласында тәжірибе алмасуға бағытталған.
Қатысушылар жасанды интеллект, автономды басқару жүйелері, зияткерлік көлік, V2X байланыс технологиялары, 5G желілері, деректерді қорғау және киберқауіпсіздік бағытындағы заманауи шешімдермен танысуда. Бұдан бөлек, бағдарлама аясында университет оқытушылары Қытайдың жетекші ғылыми-зерттеу орталықтары мен жоғары технологиялық компанияларына барып, инновациялық жобалардың жүзеге асырылу тәжірибесін зерделейді.

Айта кетейік, 21 шілде мен 10 тамыз аралығында өтетін халықаралық семинар кәсіби біліктілікті арттыруға, халықаралық әріптестікті нығайтуға және университеттің білім беру үдерісіне заманауи технологияларды енгізуге мүмкіндік береді.

Қорқыт ата атындағы Қызылорда университетінің медиа орталығы