• 27 шілде 2026
• 21

ӘЗІРБАЙЖАНДЫҚ ҒАЛЫМДАР ҚЫЗЫЛОРДАНЫҢ ТАРИХИ-МӘДЕНИ ОРЫНДАРЫН АРАЛАДЫ

Қорқыт ата атындағы Қызылорда университетіне арнайы жұмыс сапарымен келген Әзірбайжан Республикасының ғалымдары Сыр өңірінің тарихи-мәдени мұраларымен және заманауи сәулет нысандарымен танысты.

Танымдық экскурсия барысында қонақтар алдымен «Анаға тағзым» орталығының қызметімен танысып, ұлттық құндылықтарды дәріптеуге бағытталған жобалар туралы мәлімет алды. Ары қарай «Сыр жұлдыздары» шығармашылық-инновациялық академиясында болып, жас ұрпақтың шығармашылық қабілетін дамытуға арналған мүмкіндіктерін көрді. Бұдан кейін ғалымдар Қызылорда облыстық тарихи-өлкетану музейіне барып, Сыр өңірінің бай тарихы мен мәдени мұрасын бейнелейтін құнды жәдігерлерді тамашалады. Шетелдік ғалымдар өңірдің өткені, тарихи тұлғалары және мәдени құндылықтары жөнінде кеңінен ақпарат алды.

Сапардың маңызды бөлігінің бірі – Қорқыт ата мемориалдық тарихи кешені. Делегация түркі дүниесінің ұлы ойшылы Қорқыт ата рухына тағзым етіп, Құран бағыштады. Қонақтар мемориалдың тарихи-рухани маңызына ерекше тоқталып, түркі халықтарына ортақ мәдени мұраның құндылығын жоғары бағалады.
Танымдық сапар Әзірбайжан мен Қазақстан арасындағы ғылыми-мәдени байланысты нығайтуға, сондай-ақ Сыр өңірінің тарихи, рухани және мәдени құндылықтарын шетелдік ғалымдарға кеңінен таныстыруға мүмкіндік берді.

Қорқыт ата атындағы Қызылорда университетінің медиа орталығы