• 30 шілде 2026
• 63

УНИВЕРСИТЕТ ОҚЫТУШЫЛАРЫ ҚЫТАЙДЫҢ ЖЕТЕКШІ УНИВЕРСИТЕТІНДЕ ХАЛЫҚАРАЛЫҚ ТАҒЫЛЫМДАМАДАН ӨТУДЕ

Қорқыт ата атындағы Қызылорда университетінің оқытушылары Қытай Халық Республикасының Бейжің қаласындағы әлемге танымал жоғары оқу орындарының бірі – Қытайдың Ренмин университетінде өтіп жатқан халықаралық тағылымдама және тәжірибе алмасу бағдарламасына қатысуда.

Тағылымдамадан Жасанды интеллект институты директорының орынбасары Асхат Елтаев пен «Қазақ тілі мен әдебиеті және журналистика» білім беру бағдарламасының жетекшісі Серікхан Жүзеев өтуде.

Бағдарлама 23–29 шілде аралығында Қытай Халық Республикасының Сауда министрлігінің (MOFCOM) қолдауымен және Ренмин университетінің Халықаралық қатынастар мектебінің ұйымдастыруымен «Belt and Road Energy Partnership Network Think Tank Group Construction Seminar» халықаралық семинары аясында өткізілуде.

Тағылымдама барысында қатысушылар Қытайдың мемлекеттік басқару жүйесі, әлеуметтік-экономикалық даму үлгісі, халықаралық ынтымақтастық, ғылыми зерттеулерді ұйымдастыру, цифрлық трансформация және инновациялық білім беру бағыттары бойынша дәрістерге қатысуда. Сонымен қатар жетекші қытайлық ғалымдармен тәжірибе алмасып, академиялық кездесулерге, пікірталастарға және мәдени-танымдық іс-шараларға қатысуда.

Қытайдың Ренмин университеті гуманитарлық және әлеуметтік ғылымдар саласындағы жетекші зерттеу университеттерінің бірі саналады. Білім ордасы Қытайдың «Double First-Class», «985» және «211» ұлттық бағдарламаларының құрамына енген және халықаралық ғылыми-білім беру кеңістігінде жоғары беделге ие.

Халықаралық тағылымдама университет оқытушыларының кәсіби біліктілігін арттыруға, озық халықаралық тәжірибені меңгеруге және Қорқыт ата атындағы Қызылорда университетінің шетелдік жоғары оқу орындарымен ғылыми-білім беру байланысын одан әрі дамытуға ықпал етеді.

Қорқыт ата атындағы Қызылорда университетінің медиа орталығы