• 21 тамыз 2026
• 28

2026-2027 ОҚУ ЖЫЛЫНДА ЖАТАҚХАНАЛАРДА 1592 ОРЫН ҚАРАСТЫРЫЛҒАН

Қорқыт ата атындағы Қызылорда университетінде 2026-2027 оқу жылына білім алушыларды жатақханамен қамтамасыз ету жұмыстары жүргізілуде. Бүгінде студенттерді орналастыру үшін университет бойынша 1592 орын қарастырылған.
Оның ішінде университет балансындағы үш жатақханада 712 орын бар. Атап айтқанда, №3 жатақхана – 256, №5 жатақхана – 400, №8 жатақхана 56 білім алушыны қабылдай алады.
Сонымен қатар «Қаржы орталығы» АҚ арқылы келісімшарт негізінде қаржыландырылатын жатақханаларда 880 орын қарастырылған. Оның 520-сы – «ДилМаш», 210-ы – «Инкар-7», 150-і – «Өркениет» жатақханаларына тиесілі.
Қазіргі таңда жатақханаға орналасуға білім алушылардан 1139 өтініш келіп түсті.
Студенттерді жатақханаларға орналастыру кезінде олардың оқу курсы, санаты және білім беру ерекшеліктері ескеріледі. №5 жатақханаға негізінен 1-курс білім алушылары мен бірінші курсқа қабылданатын қандастар орналастырылады.
№3 жатақханада Түрікменстан, Өзбекстан, Моңғолия және Қытайдан келген шетелдік студенттер, жоғары курс білім алушы қандастар мен жоғары курс студенттері орналастырылады. Ал №8 жатақхана жазғы мектеп аясында келетін 50 студентке, сондай-ақ сыртқы және ішкі академиялық ұтқырлық бағдарламалары бойынша келген білім алушыларға қарастырылған.
«ДилМаш» жатақханаларында 1-4 курс студенттері қамтылады. Оның ішінде «ДилМаш-3» жатақханасына 1-2 курс, «ДилМаш-2» жатақханасына 3-4 курс білім алушылары орналастырылады. Мұнда Гуманитарлық-педагогикалық, Экономика және құқық, Педагогика және дәстүрлі өнер, Жаратылыстану институттарының студенттері басым.
«Инкар-7» жатақханасында 2-4 курс білім алушылары орналасады. Олардың қатарында Жаратылыстану, Жасанды интеллект және Инженерлік-технологиялық институттарының студенттері бар. Ал «Өркениет» жатақханасы 3-4 курс білім алушыларына арналған.
Білім алушыларға қолайлы жағдай жасау бағытында жатақханаға өтініш беру үдерісін цифрландыруға да ерекше көңіл бөлінуде. Осы мақсатта «Stud House» электрондық ақпараттық платформасы әзірленді. Қазіргі уақытта платформаның жұмысын жетілдіру, анықталған кемшіліктерді түзету және жүйені пайдаланушылар үшін барынша ыңғайлы ету жұмыстары жүргізілуде.
Университет жаңа оқу жылына дайындық аясында жатақхана орындарын тиімді бөлу, білім алушылардың әлеуметтік жағдайын ескеру және студенттерді қолайлы тұрғын орынмен қамтамасыз ету бағытындағы жұмыстарды жалғастыруда.