• 03 қыркүйек 2026
• 19

КИБЕРГИГИЕНА ЖӘНЕ ЦИФРЛЫҚ МӘДЕНИЕТ – ҚАУІПСІЗ ЦИФРЛЫҚ ОРТАНЫҢ НЕГІЗІ

Қазақстан Республикасы Ғылым және жоғары білім министрлігі жариялаған Кибермәдениет айлығы аясында 1 курс студенттеріне арналған киберқауіпсіздік бағытындағы ақпараттық дәрістер ұйымдастырылды.

Іс-шараның негізгі мақсаты – білім алушылардың цифрлық ортадағы қауіпсіздік мәдениетін қалыптастыру, интернет кеңістігіндегі қауіп-қатерлердің алдын алу және дербес деректерді қорғау бойынша практикалық дағдыларын арттыру.

Дәрістер барысында университеттің ақпараттық қауіпсіздік офицері Жүсіп Дәулетбай Досжанұлы студенттерге күнделікті цифрлық ортада кездесетін қауіптердің түрлері мен олардан қорғану жолдарын түсіндірді.

Атап айтқанда, сенімді құпия сөз қалыптастыру, екі факторлы аутентификацияны (2FA) қолдану, күмәнді сілтемелер мен хабарламаларды ажырату, әлеуметтік инженерия тәсілдері арқылы жасалатын алаяқтық әрекеттерден сақтану мәселелеріне ерекше назар аударылды. Сонымен қатар, өзін банк, құқық қорғау органы немесе байланыс операторының қызметкері ретінде таныстыратын алаяқтардың әрекетін қалай тану және күдікті қоңырау түскен жағдайда қандай қауіпсіздік шараларын қабылдау керектігі жөнінде нақты түсіндірмелер берілді.

Кездесу барысында әлеуметтік желілерді жауапкершілікпен пайдалану, жарияланымдар, пікірлер мен репосттардың құқықтық салдары, сондай-ақ Қазақстан Республикасының заңнамасына сәйкес дербес деректерді қорғау талаптары да кеңінен сөз болды.

Киберқауіпсіздік, цифрлық сауаттылық және ақпараттық мәдениет бағытындағы түсіндіру жұмыстары білім алушылар арасында тұрақты түрде жалғасатын болады.