• 04 қыркүйек 2026
• 21

УНИВЕРСИТЕТ ҰЖЫМЫ МАЙНҰР БӨРІБАЕВАНЫ ҚҰРМЕТПЕН ШЫҒАРЫП САЛДЫ

Қорқыт ата атындағы Қызылорда университетінде Ғылыми жұмыстар және халықаралық байланыстар жөніндегі проректор Майнұр Бөрібаеваны еңбек шартының мерзімі аяқталуына байланысты құрметпен шығарып салу рәсімі өтті.

Жиынды Басқарма төрағасы – Ректор Наурызбай Байқадамов ашып, Майнұр Бөрібаеваның университетте қызмет атқарған төрт жыл ішінде ғылым мен жоғары білімді дамытуға қосқан үлесіне тоқталды. Оның ғылым мен білім саласын дамытуға, халықаралық ынтымақтастықты нығайтуға, ғылыми-зерттеу бағыттарын ілгерілетуге, сондай-ақ өңірдің әлеуметтік-экономикалық және ғылыми әлеуетін арттыруға қосқан елеулі еңбегін атап өтті.

Салтанатты жиында Майнұр Әбілтайқызына өңірдің дамуына қосқан үлесі үшін Қызылорда облысының жоғары марапаттарының бірі – «Қызылорда облысының Құрмет грамотасы» табысталды. Сонымен қатар, университеттің ғылыми әлеуетін арттыруға, халықаралық беделін нығайтуға және жоғары білім беру саласын дамытуға сіңірген еңбегі үшін оқу орнының жоғары марапаты – «Қорқыт Ата» алтын медалі берілді.

Іс-шара барысында Қызылорда облысы бойынша «Әділет» партиясы филиалының төрағасы Жандос Базартай, «Философия және әлеуметтік-гуманитарлық пәндер» секциясының профессоры Баймырза Қожамберліұлы, «Су шаруашылығы және жерге орналастыру» білім беру бағдарламасының профессоры, техника ғылымдарының докторы Серікбай Ыдырысов, Халықаралық жобалар мен стипендиялар жөніндегі топ жетекшісі Темірболат Кеншінбай, «Қорқыт Ата атындағы Қызылорда университетінің Хабаршысы» журналының өкілі Лаура Тохетова, Гуманитарлық-педагогикалық институтының директоры Сағат Тайман, «Физика-химиялық талдау әдістері» инженерлік бейіндегі зертхананың бас ғылыми қызметкері, химия ғылымдарының кандидаты, профессор Нұрбол Аппазов сөз сөйлеп, Майнұр Әбілтайқызына алдағы қызметіне сәттілік тіледі.

Университеттің ғылыми және халықаралық бағыттарын дамытуға елеулі үлес қосқан Майнұр Бөрібаева әріптестерімен қоштасып, университет ұжымына ақжолтай тілегін жеткізді.

Басқосу барысында университет қабырғасында атқарған қызметі, әріптестерімен бірге өткізген сәттерінен сыр шертетін бейнеролик көрсетіліп, естелік суретке түсумен қорытындыланды.