• 07 қыркүйек 2026
• 21

ҚОРҚЫТ АТА УНИВЕРСИТЕТІ МЕН БҰҰ БАЛАЛАР ҚОРЫ ЖАСТАРДЫ ҚОЛДАУ БАҒЫТЫНДАҒЫ ЫНТЫМАҚТАСТЫҚТЫ ТАЛҚЫЛАДЫ

Қорқыт ата атындағы Қызылорда университетінің Басқарма төрағасы – Ректор Наурызбай Байқадамов БҰҰ Балалар қорының (ЮНИСЕФ) өкілі Данара Саранованы қабылдады.

Кездесудің негізгі мақсаты – университет пен ЮНИСЕФ арасындағы ынтымақтастықты нығайту, жастарды қолдауға бағытталған бірлескен жобалар мен әлеуметтік бастамаларды жүзеге асыру мүмкіндіктерін талқылау болды.

Басқосуда университет басшысы жастарды қолдау, олардың сапалы білім алуына, кәсіби және тұлғалық тұрғыдан жан-жақты дамуына қолайлы жағдай жасау оқу орны қызметінің басым бағыттарының бірі екенін атап өтті.

– Мемлекет басшысы Қасым-Жомарт Тоқаевтың бастамасымен БҰҰ Бас Ассамблеясы 2026 жылды тұрақты даму мақсатында Халықаралық волонтерлер жылы деп жариялады. Сондай-ақ, тамыз конференциясында Президентіміз: «Мұң, қайғы, күйзеліс – жастарымызға жат нәрсе болуға тиіс», – деген болатын. Бұл – жастардың әлеуетін ашуға, олардың белсенді әрі салауатты ортада дамуына жағдай жасаудың қаншалықты маңызды екенін көрсетеді. Осы бағытта ЮНИСЕФ-пен бірлесіп жұмыс істеуге дайынбыз, – деді Наурызбай Байқадамов.

Өз кезегінде Данара Саранова Қызылорда облысындағы жастардың қоғамдық белсенділігі мен әлеуметтік бастамаларға қатысу деңгейіне тоқталды. Оның айтуынша, бүгінде өңірде қоғамдық жұмыстар мен түрлі әлеуметтік жобаларға белсенді араласып жүрген 200-ден астам жас бар.

Кездесу барысында тараптар алдағы уақытта жастардың жан-жақты дамуына және олардың қоғамдағы белсенділігін арттыруға бағытталған ортақ жобаларды жүзеге асыру мүмкіндіктерін қарастырды.