• 11 қыркүйек 2026
• 16

«АДАМЗАТ ҒАРЫШТА – 65 ЖЫЛ»: «ОРЫС ТІЛІ ЖӘНЕ ӘДЕБИЕТІ» БІЛІМ БЕРУ БАҒДАРЛАМАСЫ БОЙЫНША ОЛИМПИАДА ӨТТІ

Қорқыт ата атындағы Қызылорда университетінде «Адамзат ғарышта – 65 жыл» халықаралық семинары аясында «Орыс тілі және әдебиеті» білім беру бағдарламасының ұйымдастыруымен олимпиада өтті.

Іс-шараның негізгі мақсаты – адамның алғаш рет ғарышқа ұшуының тарихи және мәдени маңызын кеңінен таныту, ғарыш тақырыбындағы ғылыми-әдеби мұраны насихаттау, сондай-ақ жастардың шығармашылық, зерттеушілік, цифрлық және мәдениетаралық құзыреттерін дамыту.

Іс-шараның ашылуында Гуманитарлық-педагогикалық институтының директоры Сағат Тайман сөз сөйлеп, қатысушыларға, оның ішінде шетелдік қонақтарға сәттілік тіледі.

Олимпиадаға қатысушылар бірнеше бағыт бойынша бақ сынады. Атап айтқанда, бағдарлама аясында «Звёздный микрофон» халықаралық мәнерлеп оқу байқауы ұйымдастырылып, қатысушылар ғарыш, Жер, жұлдыздар және адамзаттың арман-мұраты тақырыптарындағы поэзиялық шығармаларды бірнеше тілде орындады.

Студенттер арасында «COSMOS BATTLE: 108 минут, изменившие мир» халықаралық интеллектуалдық-танымдық сайысы өтіп, командалар Юрий Гагариннің алғашқы ғарышқа ұшуы, Байқоңыр ғарыш айлағы, ғарышты игеру тарихы, әдебиет және Қазақстанның ғарыш саласындағы орны бойынша білімдерін ортаға салды.

Сонымен қатар «Космос: взгляд из моей родины» хакатонында қатысушылар өз елдерінің ғарышқа қатысты тарихи, әдеби және мәдени ерекшеліктерін заманауи цифрлық форматта таныстырып, қысқаметражды бейнероликтер әзірледі.

Педагогтер мен оқытушыларға арналған «Человек и космос в цифровую эпоху: язык, литература и диалог культур» ғылыми-әдістемелік семинарында ғарыш тақырыбын тіл, әдебиет, білім беру және цифрлық технологиялар арқылы зерделеудің заманауи тәсілдері талқыланды.

Шара «Голос Земли: послание в космос» атты рефлексия алаңымен қорытындыланды. Қатысушылар Жердің болашағы, адамзаттың жауапкершілігі және келешек ұрпаққа қалдыратын аманаттары туралы ой-пікірлерін ортаға салды.

Халықаралық олимпиада аясында «Орыс тілі және әдебиеті» білім беру бағдарламасының студенттері «Трава у дома» әнін хормен орындап, мәдени бағдарламаны толықтырды.

Халықаралық басқосу білім, ғылым, әдебиет және цифрлық шығармашылықты тоғыстырып, қатысушылардың ғарыш тақырыбын әр қырынан зерделеуіне мүмкіндік берді.